ORANJESTAD (AAN) -- Dialuna mainta, a tuma lugar e conferencia di prensa di fraccion di MEP, cual tabata na encargo di Parlamentario Endy Croes,
ken a referi na un exigencia nobo di Hulanda y con Prome Minister a presenta den Staten un plan B, cu ta consisti di nan gevoel pa aproba un suma di 4.7 miyon florin, pa cubri un proyecto social cu Hulanda a financia y awo ta exigi Aruba pa tume over.
Endy Croes a bisa cu no obstante cu nan ta den modificacion di e campaña, y cu tur hende ta trahando duro pa esaki, Parlamento ta sigui cu su rol y traha pa asina hiba Aruba dilanti, tumando decisionnan al caso.
E parlamentario a comenta cu Diahuebs siman pasa, Prome Minister tabata den Parlamento den un reunion publico, unda ademas di su funcion tambe a representa Minister di Asunto Social, y hunto cu Departamento di Calamidad (Bureau Rampen Bestrijding Aruba 'BRA') y tambe Departamento di Asunto Social, a pidi e sentimento di Staten pa un cuestion particular.
Endy Croes a splica cu Hulanda, den e desaroyo di e crisis aki, na cierto momento a exigi gobierno di Aruba, cu entrante 1 di Juli padilanti, Gobierno di Aruba lo tin cu tuma over tur locual Cruz Cora ta haciendo.
Pa ta mas specifico, e parlamentario a splica cu Cruz Cora ta haya financiamento directamente di Hulanda, y nan tin un proyecto riba nan mes, cu gobierno no tabata meymey. Anto nan tabata yuda tambe den e crisis durante e pandemia, cu paketenan di alimento, pero gobierno no tabata tin nada di bisa den e parti aki.
E parlamentario a expresa cu fraccion di MEP ta contento cu Hulanda a yuda un cantidad di famia, pero aworaki, despues di mas di un aña, ta exigi gobierno cu den e parti nobo desde 1 di Juli, gobierno mes, mester tuma e maneho ey. Nan lo financia esaki te cu October ainda, y despues di October, Gobierno di Aruba mester presta e placa pa sigui cu e proyecto, y lo mester presta e placa aki.
Ademas, a bin un condicion extra. Gobierno di Hulanda ta exigi pa Aruba firma un protocol nobo, pa e par di lunanan aki, basa riba e statuto conoci, articulo 39, lid 1.
“Y eynan, nos prome Minister a splica cu e no ta di acuerdo cu nos mester bay firma un protocol nobo pa e parti aki, no obstante cu ya caba a firma un protocol dia 13 di November 2020, cu tambe ta cubri e parti aki.
Pa e razon aki, Prome Minister na un manera responsable, a bin Parlamento y di ‘OK’ mientras tanto cu e ta negocia esaki cu Hulanda.
Den crisis, den pandemia, den eleccion, den tur e druk cu nos tur ta, el a pone dilanti pa laga nos traha riba un plan B, y esaki ta e sentimento di Staten por haya 4.7 miyon florin, cu e proyecto aki lo costa te cu October; y henter e proyecto lo ta 14.2 miyon florin. Pa garantiza esaki, dado caso cu Minister Presidente no yega na un acuerdo cu Hulanda y Hulanda bisa cu no ta financia esaki mas, por lo pronto gobierno tin e garantia pa continuidad di esaki.
E dos instancianan cu lo bay rek e proyecto aki ta Departamento di Asunto Social y Departamento di Calamidad (BRA). Nan ta esnan cu lo traha e plannan cu ya caba ta aproba, pa tuma over 7.820 famia cu ta ricibi ayudo for di Cruz Cora y asina e proyecto aki por continua.
Croes a bisa cu Minister Presidente a splica esaki hopi cla den Parlamento y Diabierna ultimo, el a yama un reunion cu e Comision Central pa trata e sentimento di Staten na e momento ey, cu por cierto, a wordo aproba.
