ORANJESTAD (AAN): Minister encarga cu Vivienda, Desaroyo Teritorial, Medio Ambiente y Infrastructura di Sint Maarten señor Egbert Doran a bishita Aruba
riba un “fact finding mission” pa mira con Aruba ta atende cu maneho di desperdicio, considerando e reto cu Sint Maarten tambe tin cu e tema aki.
Den su reunion cu Prome Minister Evelyn Wever-Croes, e Minister di Sint Maarten a expresa su interes den e structura di Serlimar como un Sui Generis y riba esaki a palabra cooperacion entre Aruba cu Sint Maarten.
E prome mandatario di nos pais a enfatisa e importancia pa reconoce cu no ta Aruba so ta confronta reto cu maneho di sushi riba nos isla y pues semper ta importante pa intercambia pensamento cu otro paisnan den un situacion similar. Pa di e forma aki hunto por yuda otro na bienestar di cada ciudadano y medio ambiente.
Gabinete Wever-Croes ta sigui cu esfuersonan pa yega na un solucion structural pa miho maneho di desperdicio na bienestar di Aruba.
