ORANJESTAD (AAN) – Prome Minister, Evelyn Wever Croes, a duna un comentario tocante enseñanza, durante e celebracion di 60 aña di existencia di Jacinta Kleuterschool (awo Scol Preparatorio Santa Jacinta).
E dignatario a expresa cu berdaderamente enseñanza mester drenta bek den e fase di stabilidad y trankilidad y di eynan, crece.
Minister Presidente a subraya cu nos poblacion a sigui crece pero nos muchanan no a haya scolnan realmente nobo, y eynan ta caminda cu gobierno mester bay pone mas enfasis y mas atencion.
Aparte di esey, loke gobierno kier logra ta klasnan mas chikito, pasobra nan ta hopi grandi. Pero pa logra esaki mester di mas scol, docente y material. Esaki ta traduci den inversionnan grandi pa trece stabilidad y trankilidad bek den enseñanza.
Esaki ta inclui inverti den cada maestro mes pa nan sigui upgrade nan mes y haya e compensacionnan necesario pero tambe pa nan sinti miho prepara pa enfrenta tur e retonan. E mandatario a acentua, cu awendia un maestro no solamente ta yega duna les di e materia, pero e tin hopi mas tarea cu a bin acerca den transcurso di tempo , sin lubida e funcion social cu e maestro tin, cu ta hopi importante pa detecta kico ta pasa, hopi biaha. Eynan ta unda gobierno tin cu duna e maestronan mas asistencia y sosten.
