Premier Wever-Croes a reuni cu Embahadora di Reino Hulandes na Caracas

ORANJESTAD (AAN): Dialuna mainta 24 di maart, Prome Minister Evelyn Wever-Croes a reuni cu Embahadora di Reino Hulandes na Caracas, señora Carmen Gonsalves.

            Prome Minister a splica cu e Embahadora a pidi pa reuni desde un tempo caba pero e no por a sali facilmente di Venezuela pa atende cu e islanan. Apesar cu ainda no a forma un gobierno nobo na Aruba, Prome Minister ta sigui atende reunionnan cu ta di gran importancia pa Aruba. E relacion entre Aruba y Venezuela ta uno importante, pero debi na e crisis humanitario, violacion di derecho humano y e crisis politico cu tin na Venezuela, e relacion entre e dos paisnan ta bou presion. Pa e motibo aki e Embahada di Reino Hulandes na Venezuela, representa pa señora Gonsalves, tin un papel importante pa Aruba. 

Cierre Frontera

            Durante e reunion a toca hopi tema importante. Un di nan a trata e e cierre di frontera. E frontera ta cera pa diferente motibo y departamentonan di pais Aruba ta trahando nan conseho riba esaki. “Mi a scucha cu partidonan den formacion kier habri frontera mes ora, pero prome cu esey ta importante pa tene cuenta cu diferente aspecto. Pero tur esey mi lo traspasa na e Minister President nobo ora e formacion keda cla”, Prome Minister a indica. 

Desicionnan di Gobierno di Merca

            Tambe a elabora riba e impacto di e desicionnan di Gobierno di Presidente Trump di Merca. Por ehempel di e cancelacion di e licencia di Chevron pa opera na Venezuela y ki impacto esey lo por tin pa Aruba.

            A papia riba varios otro tema mas cu ta importante pa Aruba manera e relacion comercial entre Venezuela y Aruba. Tambe e Embahadora a indica cu na Venezuela tin hopi interes entre personanan cu kier bin Aruba y esey ta algo pa Aruba tene cuenta cu ne.

            Na final di e reunion Prome Minister a regala e Embahadora e shaal cu un diseño di e mata di kibrahacha y a splic’e cu esaki ta un mata hopi fuerte y e ta regala e shaal aki na hende muhenan fuerte reconociendo e forsa di e kibrahacha den nan.

            Di su parti e Embahadora e gradici Prome Minister  pa tur e añanan di cooperacion cu e Embahada y pa su rol den e Internationaal Feministisch beleid unda Prome Minister a tuma posicionnan fuerte riba nivel international pa tur hende muhe na Aruba  y den Reino.

            “Ta importante como Gobierno pa tin bon relacion cu Embahadornan specialmente den nos region. Asina ora di tempo dificil y bou hopi presion, esey ta e liña di comunicacion cu bo tin cu e pais, den e caso aki Venezuela. E tawata un bon reunion y mi ta hiba tur e puntonan riba loke nos a reuni awe den mi documento di transicion pa asina transmiti esaki na e gobierno nobo.”, Prome Minister a indica.