David Barkemeyer di DMA
ORANJESTAD (AAN): Aki algun dia, tin di prepara pa dianan di extra calor y solo mas fuerte, ora cu den movimento anual di soño, lo bay experiencia e fenomeno di ‘Equinox di Solo’ direct riba nos cabez na Aruba. Esey ta e momento cu solo ta direct riba Aruba y demas islanan ABC. E ora solo ta exacto riba e isla, y tanto dia y anochi ta di mesun duracion.
Den entrevista cu David Barkemeyer di Departamento Meteorologico di Aruba, el a confirma cu tur aña riba mesun fecha, esta 22 di April venidero, cu solo lo bay ta directo riba nos cabez aki na Aruba. E ta socede dos biaha pa aña. E otro ta dia 19 di Augustus venidero.
E equinox di equator a socede caba dia 20 di Maart, y lo ta ripiti dia 23 di September.
E dianan aki caba, e posicion di solo ta na un angulo di como 80% caba, pues falta algun dia pa e yega directo riba nos. Consecuencia di esaki ta cu bay haya mas energia solar pa meter cuadra, y esey lo pone e area aki bira mas calor y consecuentemente tin di bira mas conciente cu esnan na Aruba cu tin problema medico, e.o. cu cuero sensitivo, y hasta esnan cu ta tuma remedi cu por wordo influencia door di solo y rayonan ultraviolet. Tin varios remedi pa presion di sanger cu ta hopi sensitivo pa solo.
Barkemeyer ta conseha tur hende pa haci uso di sunblock riba bo curpa, hasta si acaso bo ta bay cana hopi den sombra. Corda bon cu radiacion di solo of calor por afectabo hasta si bo ta den sombra.
Recomendable ta pa mas hende cana cu nan sombre of petchi pa proteha curpa un poco.
“Nos ta drentando un epoca caminda calor lo bay bira abundante,” e experto di Meteorologia a indica. El a adverti pa tene extra cautela pa hendenan di edad grandi, y tambe muchanan. Tin di corda cu entrante luna di Juli te cu mey-mey di October, nan lo ta emitiendo varios advertencia pa tene cuidao cu calor unda temperaturanan maximo por yega 33º Celsius masha facil mes.
Den temporada mas calor di aña, corda bebe hopi liquido, bisti pañanan liviano y color cla, y asina evita cu bo por haci daño na bo curpa.
