ORANJESTAD (AAN): Gobierno a haci un presentacion na comercio, inversionistanan y stakeholdernan relaciona cu e Proyecto Oranjestad (Retrofit Oranjestad).
Den rasgonan grandi, Prome Minister Evelyn Wever-Croes a duna un splicacion riba con e plannan ta te aworaki unda ta trahando riba un plan cu tambe ta involucra sector comercial.
El a presenta algun idea concreto locual por stimula comercio pa pensa kico ta e mihor desaroyo cu ta mira pa centro di ciudad.
E mandatario a enfatisa cu gobierno no por haci esaki su so y ta pensando despues di a combersa cu varios stakeholder y comerciante cu tambe mester un pakete di incentivo acerca.
Esaki ta algo cu gobierno mester desaroya na caminda y papia cu esnan interesa y mira pa bin cu cualkier incentivo cu ta 'fit' e necesidadnan di e desaroyador, a señala.
"Bin cu un pakete di incentivo general cu no ta beneficia necesariamente e desaroyo den Caya Betico Croes of den centro di ciudad den pasado caba a demostra cu no ta yuda", e mandatario a expresa.
