*Mester a reserva extra stoelnan riba KLM - ORANJESTAD (AAN): Durante e conferencia di prensa di Gobierno di tur Dialuna, minister di Enseñanza Rudy Lampe a cuminza na felicita tur studiante cu a logra pasa nan eind examen exitosamente.
E mandatario a desea exito tambe na esnan cu a haya un di dos oportunidad pa pasa e examen.
“Mi tin cu bisa cu e interes pa sigui studia den educacion superior ta creciendo enormemente, unda cu awe nos mester a reserva extra stoelnan den e vuelo di KLM cu ta bay Hulanda cu e muchanan cu ta bay studia”, segun Lampe.
El a bisa cu banda di e interes grandi pa bay studia afo, tin un interes grandi tambe di hendenan cu kier studia online.
Lampe a bisa cu e interes ta asina grandi, cu ta evaluando pa pone extra hende disponibel pa por maneha tur e peticionnan cu ta drentando.
E minister a sigui bisa cu di berdad e interes ta hopi grandi pa studia via ‘Online Higher Education’.
“Nos ta den e ultimo fase pa cambia e cuadro legal (landsbesluit Aruba Lening), pa asina aki enberdad haci mas posibel ainda pa nos hendenan por aplica pa e ‘online study’”, segun Lampe.
El a indica cu bibando na Aruba bo por logra bo Bachelor degree den cualkier ramo y pesey ta haciendo tur posibel pa hende por haya un Aruba Lening corespondiente cu esaki.
“Cu esaki nos ta cumpliendo cu un di e propositonan ora cu mi a bira minister di Educacion, esta pa aumenta e cantidad di hende na Aruba cu un educacion superior, pasobra nos tabata kedando hopi atras compara cu otro paisnan”.
E cantidad di persona na Hulanda por ehempel cu un opleiding minimo di HBO ta 30%, mientras cu na Israel esaki ta 45%.
Na Aruba pa basta tempo e cifra pa esnan naci riba isla tabata rond di apenas 3%, segun e mandatario.
El a sigui bisa cu awor cu tur e posibilidadnan, tin un porcentahe mas halto cou na dado momento ta bay tin un educacion superior.
Segun Lampe, siman pasa a cumpli cu un di e ultimo puntonan di e acuerdo di gobernacion cu ainda e mester a cumpli cune.
“Nos a firma e intentie verklaring entre Universidad di Aruba y IPA, pa asina yega na un mihor cooperacion cu otro y eventualmente yega na un integracion den futuro di IPA den Universidad di Aruba”.
Asina bo ta forma un comunidad academico den nos pais chikito, pa por enfrenta tambe tur e competencianan cu aworaki a bin eyfo door di e revolucion digital cu ta tumando lugar riba tereno di educacion superior, segun Lampe.
