"Nos mester sigui cuida y ta alerta" -ORANJESTAD (AAN) – Diaranzon mainta, Minister Presidente Demisionario, Evelyn Wever Croes,
a yama un conferencia di prensa, den cual el a elabora tocante e tema di Covid-19. Tambe a hiba palabra Ronella Croes, CEO di Oficina di Turismo (ATA) y Sharline Koolman, Hefe di Departamento di Malesanan Contagioso (DBZ) a hiba palabra.
Prome Minister a indica cu Aruba ya tin cuater siman, cu un average di 3 caso nobo di covid-19 pa dia, y ta keda den e range bao di 30.
“Nos tin un grado di vacunacion yegando aworaki na 69 %, y mi por bisa cu pronto, muchanan di 12 aña bay ariba, tambe lo tin oportunidad pa vacuna.
Tur esaki ta pone cu Aruba ta recuperando. Nos recuperacion ta hasta, bayendo mas lihe cu nos a kere cu e lo a bay. Y esey ta pone cu awe nos por anuncia flexibilizacion di e mayoria di medidanan, entrante Dialuna awo”, e mandatario a bisa. (WAK IMAGEN ADHUNTO)
Prome Minister a agrega cu poco, poco nos comunidad ta bay bek na normalidad.
“E ta un normal nobo, si. Unda cu nos mester keda cuida, nos mester keda alerta; e virus te ainda aunke ta tres caso nobo pa dia nos tin, pero e tey keto bay. E variantenan ta lanta cabes, algun mas preocupante cu otro; pues, nos mester sigui cuida, nos mester ta alerta” Premier Wever-Croes a subraya.
E mandatario a reitera cu e medidanan ta bay wordo flexibilisa, y cu señora Koolman di DVG lo a papia riba esaki.
“Y den esaki mi por bisa cu gobierno ta dal un paso mas atras den cuida abo y bo famia. Aworaki ta abo mester cuida bo mes, y abo mester cuida bo famia”
“ Nos tin mas di un aña cu hunto nos ta luchando con pa combati e pandemia aki y su efectonan; con pa nos convence un y tur pa tuma esaki na serio.
“Awe nos ta mira bek, enberdad, riba un temporada hopi intenso, cu hopi tension, hopi dolor, pero como Aruba, nos a sa di uni, y esey ta e motibo di nos exito. E forza di nos union, e amor pa nos pais, e orguyo cu cada un di nos tin di ta Arubiano. Ohala cu nos laga esaki sigui guia nos den cada paso cu nos mester dal y cada reto cu nos mester tuma”, Prome Minister, Evelyn Wever-Croes, a conclui.
