Palabranan di e libertador di Aruba ora su logro a skirbi un pagina scur na 1983 - *No mester di reconteo pa conclui cu mayoria di voto personal ta sostene Lider Evelyn - *Voz di Pueblo ya a dicidi cu Evelyn Wever-Croes mester keda lider di Aruba
ORANJESTAD(AAN)—Un siman a pasa for di e momento cu Pueblo di Aruba a bay urna electoral pa dicidi riba e personanan cu mester representa Pueblo den Parlamento y forma un gobierno cu ta traha na interes di e hende, e ciudadano cu mester wordo sirbi den tur accion gubernmental.
Pueblo di Aruba a papia un palabra sumamente cla y a confirma loke a bini dilanti den tur encuesta, den rapportnan oficial, den relatonan di Reino Hulandes. Pueblo no a vota pa e cantidad di sunchi cu el a ricibi ni pa e cantidad di brasa cu a wordo priminti.
Pueblo a vota pa e lider cu Aruba tabata tin na e momento cu mas Aruba tabata tin mester di un lider, cu tabata na 2017 ora futuro di Aruba tabata sumamente scur.
Na urna electoral Pueblo a mustra kende mester ta e lider nobo di Aruba.
Votegetter ta e titulo cu durante tres eleccion Mike Eman a carga como su bandera. Si durante eleccion 2017 ya AVP a perde voto loke a pone Mike perde caminda di cas, na 2021 Pueblo di Aruba a mustra cu cifranan cu no ta permiti duda, cu e no kier Mike Eman pero Evelyn Wever-Croes como dirigente.
For di e momento, Aruba a haya su mes confronta cu un furia di masbango. Tur tipo di conteo nunca conoci na Aruba a cuminsa pa determina kende ta lider di partidonan no tradicional, aunke varios di e politiconan envolvi solamente a cambia nomber di partido y color di petchi.
Manera por a spera AVP a cuminsa cu accion cu a pone nomber di e instancianan mas prestigioso y importante na duda pa asina trata di sconde su propio berdad.
Con leu Mike Eman por yega a keda demostra ora el a exigi pa Gobernador kibra e regla di nombra un informador, pero nombra dos informador pa asina tanto Evelyn como Mike por a bira informador.
Un exigencia increibel teniendo cuenta con e cantidad di voto personal di Mike Eman a cay for di trapi mientras Evelyn Wever-Croes a bay halto, manera despues di tur debate y den tur encuesta Pueblo a haya chens di expresa su mes.
E siman tras di lomba a haci nos repasa y historia y bolbe na e momento cu na 1983 Betico Croes a bolbe for di Hulanda y a entrega Aruba e logro di su Status Aparte.
Pa partidonan cu tabata contra Betico Croes y Status Aparte, e sosten politico cu Pueblo a duna Betico Croes, a resulta den rabia y odio. Esaki a haci cu 1983 no tabata solamente un temporada cu Aruba a celebra un victoria, pero el a bira doloroso pa Betico Croes y tur cu tabata sostene Betico Croes.
Yamada cu menasa di morto tabata drenta na oficina di DIARIO, cu tabata e instrumento di comunicacion di Pueblo di Aruba.
Ora Aruba a haya su Status Aparte na Hulanda, momentonan tragico a wordo skirbi na Aruba cu un Betico Croes herida pa un tiro na Veld di Winston.
“Kibra Betico” tabata skirbi riba borchinan di partidonan politico, cu tabata trata na tur forma pa terorisa tur cu tabata sostene Betico y e Lucha di Status Aparte.
Na tur forma e opositornan di Betico Croes, tabata trata na desprestigia Betico Croes y otro luchadornan pa Status Aparte pa kita e logro di Status Aparte for di Betico Croes.
Awe e mes tactica ta wordo practica despues cu Pueblo di Aruba a honra e trabou duro di Evelyn Wever-Croes cu a duna prueba riba papel de forma cu el a logra saca Aruba for di crisis.
Na tur forma ta trata na kita meritonan di Evelyn Wever-Croes y sconde e desasternan cu Evelyn Wever-Croes a hereda.
Pero tanto na 1983 como na 2021 tin un gran berdad. “Los perros ladran, la caravana pasa”.
Palabranan cu Betico Croes tabata uza pa anima Pueblo di Aruba pa sigui cana, sigui lucha na forma honesto pa alcansa metanan sagrado no pa un grupito elitario, pero pa tur Arubiano sin discriminacion!
