Expertonan ta indica cu no tin tempo pa wega politico tranca formacion Gobierno - *Despues di Banco Central tambe CAFt ta confirma cu economia ta recupera - *Recuperacion economico ta debolbe comercio y trahado apertura pa futuro
ORANJESTAD(AAN)—Dia 8 di Juli 2021, un constelacion nobo di Parlamento lo tuma asiento. Un dia prome cu e representantenan cu Pueblo a eligi durante ultimo eleccion bini hunto, Gobierno Evelyn Wever-Croes lo reuni cu e Ministro Hulandes pa relacionnan den Reino, Raymond Knops.
Sin duda e agenda cu wordo discuti, lo abarca e forma cu Aruba ta cumpli cu e exigencianan Hulandes pa asina a base di un maneho financiero sano, crea un base fuerte pa autonomia di Aruba riba tur tereno den futuro.
Cu Aruba ta riba e bon caminda, no solamente ta bini dilanti den e cifranan di produccion economico di e pais, pero tambe den palabranan di instancianan importante pa e pais manera ta e caso cu Banco Central, cu a mustra cu economia di Aruba ta recupera.
Palabranan cu e Presidente di e Comision di Supervision Hulandes a confirma durante su contacto cu prensa na Aruba.
Sinembargo, manera ta conoci, Aruba mester bay atende awor su presupuesto pa 2021 pero tambe manera Algemene Rekenkamer Aruba a mustra, e cuentanan annual den cual e forma cu a gasta placa di Aruba ta bini oficialmente dilanti.
Informacionnan cu DIARIO tin di tur angulo ta, cu e cantidad di trabou cu ta den movecion na Aruba, ta confirma cu e pais ta riba un caminda di bon recuperacion ya cu tin accion.
Cu Reino Aruba sigur lo mester papia di e situacion di AZV, cu ta depende tambe di loke economia produci pa Aruba.
Los di esaki, mientras recuperacion economico pa medio di turismo ta continua, e diversificacion y ampliacion di economia tambe mester sigui su curso.
Informantenan clave a indica na DIARIO cu despues di eleccion 2021, no ta bay tin tempo di reposo ya cu Aruba mester sigui cana cu e mes velocidad cu el a move dilanti pa por a alcansa un recuperacion.
Segun expertonan ta hustamente den e tempo di pandemia y directamente despues,mester duna fortifica e base economico di e pais cu diligencia teniendo na cuenta cu ta hopi pais na mundo tambe mester reforsa nan base economico.
E forma cu Aruba a atende cu e plan di vacunacion a haci cu e pais por regresa na un normal.
Na momento cu Parlamento reuni otro siman, mester tene cuenta cu un representacion temporal ya cu na momento cu forma un gobierno nobo, e personanan cu ta bay asumi un luga den gobernacion, mester retira.
Aruba ta enfrenta un temporada sumamente interesante y por comprende cu e plan di Gobierno Wever-Croes pa recuperacion economico, lo ta di gran importancia pa inicio di e proximo periodo di gobernacion di e pais cu segun voto di pueblo durante eleccion, mester ta continuacion di gobernacion di Evelyn Wever-Croes.
