El a tuma lugar te den oranan di marduga
ORANJESTAD (AAN): E fin di siman cu a pasa, Prome Minister Evelyn Wever-Croes tabata na Guatemala pa e traspaso di mando di Presidente saliente senior Alejandro Giammanttei pa señor Bernardo Arévalo.
Despues di un atraso di 9 ora, e ceremonia di huramentacion di Guatemala su presidente nobo Bernardo Arévalo y vice presidente nobo Karin Herrera a tuma luga den oranan di marduga.
Congreso na Guatemala a nenga pa aproba credencialnan di diputadonan electo, cu a trece tardansa den e proceso di huramentacion di presidente electo Arévalo. A convoca un reunion di urgencia di tur e hefenan di gobierno na unda cu a emeti un declaracion pa Congreso respeta e eleccion di e pueblo di Guatemala, y pa permiti e huramentacion di presidente electo Arévalo.
Presente na e reunion aki tabata tambe presidente di Costa Rica Rodrigo Chaves Robles, presidente di Paraguay Santiago Peña, presidente di organizacion di estadonan americano Luis Almagro, y varios canciyer.
Den su discurso presidente Arévalo a declara cu Guatemala nunca mas mester bay pa violencia ni corupcion. Algun miembro di Congreso di Guatemala kier a stroba e huramentacion desde resultado di eleccion na augustis 2023, te cu awe ainda. Pero pa 2or di marduga, e presidente y vice presidente a huramenta y den oranan tempran di dialuna, e gabinete di minister a huramenta.
Prome Minister a expresa di ta contento di por a forma parti di e proceso aki y ta felicita pueblo di Guatemala cu nan presidente nobo. Den nomber di Aruba, Hulanda y demas paisnan den Reino, Prome Minister a felicita Presidente Arévalo y a desee tur clase di exito den su maneho di gobernacion especialmente den su plannan pa combati corupcion y respeta derechonan humano.
https://diario.aw/categories/noticia/general/premier-evelyn-wever-croes-presente-na-huramentacion-di-president-di-guatemala#sigProId6c3a534f34
