Premier Evelyn Wever Croes cu tres deseo pa e Parlamento nobo

ORANJESTAD (AAN) – Den su calidad di Parlamentario, pa cera e Aña Parlamentario 2017-2021 y habri e Aña Parlamentario nobo 2021-2025,

Minister Presidente mr. Evelyn Wever-Croes a hiba palabra den Sala di Staten, dirigiendo su mes na Presidente di Staten mr. Edgard Vrolijk.

            El a cuminza pa desea hopi exito na tur Parlamentario, pa e Aña Parlamentario nobo, y el a comparti tambe tres deseo mas, Fundeshi a wordo poni den e Aña Parlamentario cu ta cabando aworaki, y e ta desea pa continua cu esey.

Su otro deseonan ta:

1. Un parlamento fuerte: “Cu e esfuerzonan di independizacion di nos Parlamento, por finaliza den e aña Parlamentario nobo, nos dilanti, na e modelo cu Parlamento lo scoge pe logicamente, pero un Parlamento fuerte cu por brinda cabes na e retonan cu Aruba ta enfrentando”.
   
   
2. Mira e esfuerzonan di ombudsman cristaliza: “Nos a cuminza cu esaki den e Aña Parlamentario finalizando; lamentablemente, pa un diferencia di opinion, nos no por a keda cla cune, pero mi ta kere cu e Parlamento aki cu a demostra iniciativa pa un ombudsman, aceptando e ley unanimamente, aworaki nos ta den e momento crucial di demostra cu nos ta kere ombudsman. Nos mester ancre den e Constitucion. Ohala nos por pone diferencianan un banda y logra cu esaki tambe por pasa, y duna pueblo loke pueblo a bin ta pidiendo e Parlamento aki; esta, cu e ombudsman ta ancra den nos Constitucion y por funciona como un Defensor di Pueblo”.
   
   
3. “E di tres deseo grandi cu mi tin ta cu e Parlamento aki mantene e reglanan di integridad asina na halto. Nos a papia hopi di dje y tin un Ley di Integridad cu ta den tratamento, ohala cu hopi trempan den e Aña Parlamentario nobo, e ley aki por pasa”, e dignatario a subraya.

E mandatario a expresa cu no ta pasobra e ta di Partido MEP of pasobra coalicion kier, of MEP kier.

“E ta pasobra pueblo ta pidi. Pueblo ta pidi pa tin reglanan pa asina por atene su gobernantenan na nan, pero su parlamentarionan tambe na nan. Y si e Ley aki pasa, tur e Parlamentarionan cu ta bao investigacion actualmente, tin cu abandona nan cargo na e momento aki, anto e ora ey por fin bo por hala rosea akiden y bisa cu di berdad e Parlamento aki ta para pa reglanan di integridad”, Wever-Croes a subraya.

            E mandatario kier a finaliza refiriendo na e tema di confianza. “E Parlamento aki, cada un di e 21 parlamentarionan akinan, guia pa nos Presidente ta nos ta esunnan cu mester percura pa e confianza cu pueblo a pone den e Parlamento aki, keda manteni na l’aira, na halto. E ta nos responsabilidad pa mantene e confianza aki. Pasobra pueblo a demostra cu e confianza den Parlamento ta aumento, e ultimo tempo. Pueblo tin su aprobacion, su desaprobacion. E confianza cu tin den Parlamento, ta nos pa dicidi si nos ta mantene den nos pueblo of si mes ta bay permiti pa esaki bay perdi”, e dignatario a expresa.

            El a agrega cu e ta di acuerdo cu respet pa otro, y respet pa e diferencianan di ideologia, di opinion, y politico. “Cu respet bo ta gana confianza y esey ta algo hopi importante” e mandatario a remarca.

            Minister Presidente a subraya: “Ora mi ta scucha parlamentarionan eyfo, ta instiga contra otro, cu mentira contra otro, hasta ta papia di venena otro, di mata otro, sinceramente mi ta lamenta.

Mi mes tabata ocho aña den Parlamento, despues cuater aña den Gobierno, y mester bisa cu Parlamento cu e respet cu tin eyfo pa Parlamento a bin ta aumentando, pero tipo di accionnan asina, specialmente di Parlamentarionan hoben, nobo, ta papia di ban venena otro, e ta algo cu ta bay tin su consecuencianan.

E consecuencia ta cu e ciudadano e ora ey ta bay perde su confianza y e respet cu mester tin pa Parlamento. Tur e trabao cu nos a bin ta haciendo den un frega di wowo por bay perdi di e forma ey. Pesey, mi ta boga pa ora bo ta debati cu otro, ora bo ta trece bo puntonan padilanti, trece nan: uno, substancia, basa riba berdad y no bay den e direccion di instiga, mentira of bisa ‘mi kier mira parlamentarionan morto, mi ta envenena nan.

Pasobra esey no ta un cos cu bo ta haci; e ta un cos sumamente infantil pero ta un cos tambe hopi peligroso, cu no por keda te eynan. Confianza ta algo cu ta tuma tempo pa bo por traha riba dje. Pero bo ta perde den un click di dede, den un frega di wowo”, e dignatario a señala, indicando na final cu ohala cu Parlamento nobo por mantene e confianza cu pueblo a deposita den cada un di e parlamentarionan.