Aruba como destinacion turistico mester keda alerta enfrente malesa - Hulanda ta scrap medidanan cu den e normal nobo mester a mantene - Variantenan Delta y Mu ainda ta competi como peliger pa ser humano
ORANJESTAD(AAN)- Mundo ta den un ansia pa bolbe na normalidad y bandona restriccionnan di Covid-19.
Expertonan cu a asisti DIARIO den informacion di Aruba for di momento cu e Coronavirus nobo a pone mundo lomba contra muraya na 2020, ta sumamente preocupa pa e forma cu publico local y internacional ta posiciona su mes ainda contra e malesa, cu tin cientificonan den incertidumbre grandi.
Informantenan a mustra DIARIO riba medidanan cu lo wordo gescrap na Hulanda na final di September y ta hustamente e medidanan cu hasta den un normal nobo, ora e grado di inmunidad publico a wordo alcansa, mester wordo mantene na paisnan cu kier evita sorpresa di parti di Covid-19.
“Aruba ta un pais cu ta depende di turismo. Esaki ta nifica cu Aruba ta depende di bishitantenan di exterior, cu ta tambe paisnan caminda medidanan di Covid-19 lo wordo gescrap,” informantenan a indica.
Nan a mustra riba interes grandi di e turista Hulandes tambe pa bishita e islanan Hulandes den Caribe, entre otro Hulanda y segun informacion ya por nota aumento den e cantidad di pasaheronan cu ta interesa den Caribe Hulandes.
E peliger grandi cu informantenan ta mira ta, cu tanto vacacion di Arubianonan na Hulanda y otro paisnan cu ta cuminsa scrap medidanan, como bishita di e paisnan aki, por habri porta pa casonan di Covid-19 den un situacion mundial cu ta keda preocupante.
Dos variante sigur tin atencion mundial. Ta trata di e conocido Delta cu na India sigur a provoca desaster pa e forma cu e ta plama y a duna prueba di esaki na Aruba tambe.
E otro variante ta Mu, cu a causa morto y desesperacion na Colombia y a haci su entrada na Merca.
Cientificonan na e momentonan aki ta studia ainda e posibilidad cu Mu por bira un reto pa e vacuna actual.
Esaki ta haci cu e medidanan preventivo cu mester a wordo mantene hasta si comunidad yega na 85 porciento di vacunacion y asina drenta e normal normal, mester a keda vigente.
Na Hulanda a wordo anuncia, cu distancia social lo por wordo gescrap. Loke ya a bisa cu lo scrap entrante 25 di September ta limitacion pa acontecementonan cu ta atrae publico cu ya no ta wordo exigi pa sinta.
Conciertonan y otro eventonan publico por bolbe ricibi publico, cu sinembargo mester duna prueba di vacunacion.
Informacionnan cu DIARIO a ricibi di informantenan na Hulanda mes, ta papia di preocupacion serio pa e decision di Gobierno Hulandes na un momento cu ainda Covid-19 no ta bou control.
Na diferente pais cu a pensa cu nan a controla Covid-19, manera na Australia y na Israel por nota con el a bolbe ataca.
“Pakico exigi pa elimina medidanan cu ainda ta necesario?” Un pregunta cu expertonan ta haci nan mes mientras mundo ta avansa pa e temporada di dianan di fiesta cu na 2020 a wordo afecta.
Expertonan ta adverti cu falta di un sentido di realidad di e peliger di Covid-19 por destrui tur loke mundo a alcansa den e lucha contra e malesa, cu sigur pa loke ta trata e variante Mu tin hopi preocupacion pasobra ta paso a paso mundo ta cera conoci cu e realidad di Covid-19 cu ta un malesa nobo.
DIARIO ta sigui informa Aruba di e situacion mundial den cooperacion cu informantenan internacional cu ta sumamente preocupa cu e hecho cu mundo kier deshaci mentalmente di e peliger di e malesa, cu asina ta haya oportunidad pa bira mas peligroso y hasta produci variantenan cu ainda hende no por controla.
“E programanan pa vacunacion na hopi pais ta duna resultado. Pero mester mantene medidanan basico sigur den situacionnan cu importacion di un malesa ta facil, manera na un pais cu ta depende di turismo,” informantenan a duna di conoce.
