Premier Eman ta indica cu Gobierno ta sigui cu paso firme den revitalisacion di Playa

Cu esfuerso di Minister Wever y Minister Herde

• Un idea pa kico haci cu ex-Esso Lagoen 

ORANJESTAD (AAN): Gobierno di Aruba a anuncia un destaho publico pa duna un bida nobo na e edificio historico unda antes tabata e gasoline station di Esso Lagoen, den bario di Klip na Playa.

   E proyecto ta forma parti di e vision mas amplio di Gobierno pa revitalisa centro di Oranjestad, combina actividad economico cu preservacion di patrimonio y fortalece e sentido di identidad y pertenencia den comunidad.

   Prome Minister mr. Mike Eman, hunto cu Minister mr. Geoffrey Wever y Minister drs. Rene Herde, a duna e anuncio dilanti di e edificio, cu actualmente ta den estado di deterioro pero cu pa Gobierno, tin un potencial grandi pa bira un punto atractivo y caracteristico den centro di ciudad.

   Prome Minister Eman a expresa su satisfaccion cu e proyecto ta yega na e siguiente fase y a destaca cu revitalisacion di Oranjestad no ta trata solamente di infrastructura of actividad comercial. Segun dje, e monumentonan y edificionan historico tin un funcion importante den conserva e memoria di Aruba y den fortalece e conexion di comunidad cu su propio historia. “E desaroyo comercial, pero tambe e desaroyo di duna nos un sentido di identidad, duna nos un sentido di pertenencia, ta sumamente importante,” Prome Minister Eman a bisa.

   E ex-gasoline station di Lagoen tin un significado personal tambe pa Prome Minister Eman, kende a crece den e area di Klip. Durante su declaracion, el a recorda con e edificio tabata forma parti di bida diario di hopi famia di e bario y con e luga ta carga memoria di diferente generacion. El a indica cu rescata e edificio no solamente lo crea un oportunidad economico nobo, sino tambe lo conserva un punto di referencia pa e comunidad.

   “E hecho cu nos tin un edificio asina cu ta corda nos di e tipo di historia, cu ta conecta bek e famianan aki na otro, ta e balor adicional di e hecho cu e monumento aki ta wordo rescata,” Prome Minister a declara. E intencion ta pa e edificio por wordo desaroya como un boutique restaurant. Pa esaki, e propiedad di Pais Aruba lo wordo pone riba mercado mediante un proceso di destaho publico, caminda inversionistanan y empresarionan interesa lo por presenta nan propuesta y estudio di factibilidad.

   Minister Geoffrey Wever a splica cu e proyecto ta resultado di varios aña di preparacion y ta forma parti di e trabao cu a cuminsa pa revitalisa centro di Oranjestad. El a indica cu e proceso lo ta habri y transparente, cu condicionnan claramente defini y evaluacion door di un comision independiente cu representacion di, entre otro, ATA, ATIA, Ministerio di Infrastructura, Ministerio di Economia y DIP. E inscripcionnan lo wordo habri na Camara di Comercio dilanti di notario, pa asina garantisa cu tur participante tin e mes oportunidad. Despues di evaluacion, e comision lo presenta su recomendacion tocante e propuesta cu ta cumpli miho cu e criterianan estableci.

   Prome Minister Eman a elogia e esfuerso di Minister Wever, kende ya den un gobierno anterior a inicia diferente proyecto relaciona cu renovacion di centro di ciudad. El a destaca tambe e contribucion di Minister Rene Herde y e departamentonan bou di su responsabilidad pa crea e condicionnan infrastructural y legal necesario pa por realisa e proyecto.

   Minister Herde a indica cu e tarea di infrastructura ta precisamente pa crea e facilidadnan y instrumentonan necesario pa desaroyo por tuma luga. El a reconoci cu proyectonan di e magnitud aki ta exigi tempo, pero a enfatisa cu Gobierno haci un empuhe pa acelera e procesonan, respetando e proceduranan legal.

   Prome Minister Eman a remarca cu e renovacion di e ex-gasoline station den un cuadro mas amplio di e proyectonan cu actualmente ta transforma centro di Oranjestad. El a menciona, entre otro, e renovacion di e brug banda di Wilhelminapark, expansion di Parlamento di Aruba, restauracion di Fort Zoutman y Willem III Toren, futuro desaroyo di e edificio unda ante tabata Ministerio Publico, y e siguiente fase di renovacion di Wilhelminastraat. El a destaca tambe e contribucion di iniciativa priva, incluyendo restauracion di e monumentonan y otro proyecto den centro di ciudad.

   Segun Prome Minister Eman, tur esaki hunto ta mustra cu Oranjestad poco-poco ta recupera un bida nobo. E meta ta crea un centro di ciudad caminda tin actividad economico y comercial, pero caminda pueblo Arubiano tambe por reconoce su historia, su cultura y su identidad.