Na su opinion e forma di pusha tur otro gremio no ta adecuado
- President di SNBA ta pidi tur grupo pa recapacita
ORANJESTAD (AAN): Errol de Freitas kende ta president di San Nicolas Business Association (SNBA), a enfoca e siman aki riba e deseo pa Dialogo Social sigui, aunke den e ultimo tabatin cierto desaroyo cu a ser treci dilanti, cu no a haci e encuentronan comfortabel pa tur hende.
E ta splica cu Dialogo Social ta nada nobo, specialmente pa e gobierno aki di AVP, unda di comienzo Prome Ministro Mike Eman a busca e opinionnan di tur e gremionan y otronan cu ta stakeholders pa cu e topiconan di momento.
Algun luna pasa ora cu SNBA a participa den e Dialogo Social, y ta importante cu esaki ta un combersacion unda ta papia for di puntonan di bista di ‘werkgevers’, ‘werknemers’ y ‘gobierno’.
Pero despues ta tende den pasiyo un par di cosnan cu e gremio di C.U.A. tabatin di bisa, esta cu na dado momento nan a splica na Gobierno, cu si acaso nan kier pa tin un Dialogo Social exitoso.. “bo no por tin cierto organisacion den dje.”
“Nan a subi lomba di Organizacion OPPA di pensionadonan. Anto bo sa, cu señor Valdes a para duro y a bisa nan flat, cu tende aki, cu 30 pa 33% di e isla su economia aki ta depende di pensionadonan, y a puntra ta kico nan ta papiando di dje,” De Freitas a declara den un entrevista cu DIARIO.
“Awor, berdad cu Camara di Comercio (KvK) no ta un gremio, pero locual Camara di Comercio ta trece, e tin un draagvlak cu di hopi cu ta den nos comercio y nos industria, specialmente un persona manera Sr. Martijn Balkenstein,” e president di SNBA a remarca.
Segun Errol de Freitas, e mes lo no ta envolvi den un organizacion, “si acaso Sr. Balkenstein no ta na nos banda. Bo sa pakico? Pasobra Sr. Balkenstein ta claro, e ta transparente, y e persona aki ta to-the-point. Kiermen, bo sa, ora bo tin hendenan asina, ta con bo kier bay laga nan afo for di Dialogo Social?”
President di SNBA a bisa, cu e declaracion ey tabata manera un wanta den cara, “pasobra ta papia asina di un grupo participante cu tin 60 pico aña ta contribuyendo nan, compara cu un grupo nobo cu apenas tin 2 aña di existenciam anto nan tuma tur e poder, y kier tin tur cos di bisa eynan?”
E ta un sorpresa? Pa Errol de Freitas di SNBA, na dado momento, e ta bisa abiertamente, cu nan ta costumbra di e trato ey. “Nos ta custumbra cu e trato cu... cu bo sa, cu nan ta tuma over di tur cos. Pasobra hopi cos cu ta pasando rond di nos, y ora bo tin diferente grupo, semper tin un “clique” eynan cu ta anda uni y pusha tur otro grupo den e fondo.”
De Freitas awo ta spierta e otro gremionan cu actualmente parce di ta di acuerdo cu e grupo nobo. E ta adverti nan pa tene wowo habri, pasobra “e ta bay costabo eventualmente. Pasobra na final di dia, e hues ta pueblo. Bo por papia cuanto bo kier di bo negoshi y tur e cosnan ey, pero e hues ta pueblo.”
E president di SNBA a agrega, cu e mes no a preocupa, pasobra loke el a mira con Premier Eman di ora cu el a huramenta, e tabata enfoca riba varios tema, incluyendo algun cu pa SNBA no tabata di prioridad pa San Nicolas. Pero na dado momento el a para y puntra e grupo ta con nan kier pa esey socede. El a para y bisa cu e ta schors e Dialogo Social aki, pasobra Gobierno no mester tene un dialogo asina, pasobra si nan kier, nan mes ta djis haci nan escogencia y bay Parlamento pa mira si nan ta aprobe of no.
De Freitas ta gradici Premier Eman pa e movimento ey. El a agrega na final: “Mi ta desapunta di mi coleganan. Anto mi ta spera cu tur hende por recapacita, pasobra e cos ey ta andando constant. E peleanan chiquito cu ta sigui, y cu ta causando mas daño cu e ta haci bon.”
