*45 bario di FCCA ta den situacion precario!
ORANJESTAD (AAN) – Minister Presidente, señor Mike Eman, siguiendo cu su entrevista cu Matutino DIARIO, a indica cu no tin un structura, ni un definicion corecto di kico ta e responsabilidad di gobierno, y kico di FCCA, refiriendo na su bishitanan den bario, principalmente den sectornan di cas di pueblo, unda tin 45 bario den situacion precario.
No obstante, el a subraya cu ta un responsabilidad di FCCA pa percura pa e mantencion di e viviendanan, y aki, kizas pa falta di fondo financiero, of pa falta di prioridad, esaki no a tuma lugar manera mester ta.
“Hopi di e casnan di FCCA unda mi a drenta tin un necesidad grandi pa mantencion. Nos a wak esey na Bushiri, hopi obvio na De Vuyst, y danki Dios na e momentonan aki, despues di e bishita, nos ta mira movilizacion a cuminza. E sonidonan na locual nos ta wak a yega tur caminda, cerca DOW tambe, y tambe un Instancia manera CEDE Aruba, na De Vuyst, tin un gazebo cu tabata patrocina pa nan, cu practicamente a bay p’e otro”, e dignatario a menciona, y a agrega cu eynan tin un tarea tambe, tal vez tambe pa CEDE Aruba rebishita e barionan, unda nan a pone algun facilidad, entre otro un gazebo, pa mira si e cosnan t’ey ainda.
“Un parti importante tambe ta e formacion di Asociacionnan di barionan, y pa nos, nos ta keda wak bek y punta dede, pero pa mi ta mas importante cu tempo ta core, pa haci un diferencia den e tempo nos dilanti, y cu un sentido mas positivo nos ta treciendo hunto cu nos, hendenan di FCCA ora nos ta cana, hendenan di DOW, City Inspector y Serlimar ta hunto. Kiermen, tur hende ta sinti e responsabilidad y tur hende ta sinti nan mes un tiki ‘aangesproken’ pasobra esaki no a bira asina, su so. Tur hende a cera wowo y aworaki nos tin 45 bario di FCCA den un situacion hopi precario, pero rond di Aruba nos ta mira cu e problema di sushi ta esun principal”, Premier Mike Eman a remarca.
