*Fortaleciendo e base creativo di e isla
ORANJESTAD (AAN): Diplomatico cultural, productor y artista Michael Lampe, recientemente a duna un masterclass intensivo na Aruba pa productor di musica local. E sesion tabata enfoca riba tecnica di produccion, desaroyo creativo y maneho di carrera.
Participantenan, tanto emergente como estableci a tuma parti den masterclass y discusion riba con por navega e industria musical moderno. Como tambe intercambio di ideanan pa cu e proceso di produci projectonan musical.
Lampe, cu ta traha entre Aruba y Amsterdam como diplomatico Cultural y bou di nomber artistico Fellow y Datapanik— a bisa cu e masterclass ta parti di su vision pa conecta talento creativo di Aruba cu plataforma internacional.
“Nos tur kier wak cu nos artista por yega riba tarima mundial, pero e camino ta cuminsa na cas,” Lampe a bisa. “Nos mester duna nos talento e habilidadnan, confiansa y sosten pa competi internacionalmente — y esaki ta cuminsa cu fortalece e base creativo aki na isla.”
E masterclass a tuma luga den colaboracion cu Fonds Podiumkunsten y Cede Aruba, como parti di un programa pa desaroyo di talento cu ta busca fortalece e industria creativo den islanan ABC y promove intercambio cultural internacional.
E iniciativa ta refleha e compromiso continuo di Lampe pa yuda desaroya e sector creativo di Aruba for di e base. Pa ta parti di un vision mas grandi: construi brug cultural, forma colaboracion cu figura cultural influencial, y crea caminda pa talento di nos isla yega na e escenario mundial. Participantenan cu a tuma parti di e Masterclass ta Artista y Productor local Jralph, Manager y productor Amal Farhat-Kasouf, Musico/productor Yeremy Bonariba, Musico/Productor Ivan Quandus, Artista Ataniro y productor y artista local Nigel Hoek.
