Herrick Henriquez, director di ATIA:
ORANJESTAD (AAN) — Director di Aruba Trade & Industry Association (ATIA), Herrick Henriquez, den entrevista cu Matutino DIARIO a duna di conoce cu ATIA tambe ta forma parti den e Foro Nacional di Pago, cu ta wordo maneha door di Banco Central.
Esaki ta un foro cu tin di tres pa cuater aña caba andando, y el a cuminza riba e pagonan digital y e aña aki a papia mas tanto di fraude y otro asuntonan digital.
“Nos si ta pensa cu por wak den e service cu a wordo haci den e foro cu e pago digital, y acceso na pagonan digital ta algo cu mayoria di companianan kier, tur hende kier esey. Nos mester yega na un manera cu e turistanan of bishitantenan cu bin Aruba, tambe tin acceso na e plataformanan digital aki”, Henriquez a indica.
Aruba tin caba algun plataforma cu ta wordo uza, pero cu ta limita na banconan local, y tin un center cu tambe ta drentando mercado, pero esakinan no ta suficiente, segun director di ATIA.
El a menciona cu Merca ta hopi conoci pa e hopi carchinan cu nan tin, y Hulanda tambe pa e sistema cu nan tin. Apple Pay via telefon ta algo cu por wak mundialmente, y Google Pay unda por transfer cash di un pa otro.
“Dus, esaki ta algo cu nos mester cuminza traha riba e plataformanan ey na e Isla aki tambe. Esaki ta algo cu nos a trece dilanti tambe basta biaha, pesey nos ta keda traha cu Banco Central den e foro pa por trece solucion”, director di ATIA Herrick Henriquez a enfatiza. “Nan tin algun solucion cu nan ta keda wak pa wordo implementa”, Henriquez a menciona.
