Pregunta na Mike Eman y Gerlien Croes ta cu si nan a cumpli cu ley

tmar Oduber cu preguntanan skerpi

• Di con ta Mike so ta atende asunto di De Meza 

ORANJESTAD (AAN): Otmar Oduber kende ta lider di PPA, a splica cu segun e ley cu ta regula integridad di candidatonan pa bira minister y ministernan ta papia di 1 formado. Pero na Aruba nos conoce 2 formado, esta formado Eman y Croes.

   Oduber ta puntra, cu kizas p’esey nos ta mira Eman so ta atende e asunto di Mike de Meza? Segun e ley aki hamas e formadonan por a propone na Gobernador pa Mike de Meza ta un candidato pa bira minister si e no por a pasa e screening (articulo 2 te 8 inciso 1 di e ley) y conforme e mesun ley (articulo 8 inciso 2) mester a notifica de Meza por escrito cu e no a pasa screening “From Day One”.  Asina de Meza na su turno por a dicidi di busca su derecho y bay Corte fo’i masha dia caba

   E ley di screening di minister ta hopi duidelijk y ta stipula exactamente kico e formadonan por haci y kico no. E ley ta bisa den un di su articulonan cu for di e momento cu un di e consehonan ta negativo riba un candidato pa minister, cu esaki no por worde presenta na Gobernador (articulo 8 inciso 1). Tambe e mesun ley aki ta stipula e responsabilidad y deber di e formadonan pa notifica por escrito e candidato pa minister cu no a pasa e screening.

   Pregunta ta keda cu si e pasonan aki stipula den e ley cu e propio parlamentarionan di e tempo ey na 2021 a aproba, awe na 2025 a worda ehecuta y cumpli cune. Ta parce te awo cu esaki no ta e caso, paso sino sr. de Meza lo por a bay busca su derechonan ya caba fo’i basta dia na Corte y no te awo cu ya tur otro minister a huramenta pa algun siman caba, paso e screening di sr. De Meza a cuminsa hunto cu tur e otro nan. Esaki ta significa cu e formadonan NO a cumpli cu nan deber segun ley y ta motibo tambe cu un carta lo sali pa Minister President Eman, invitando su persona pa bin responsabilisa y duna informacion na Parlamento di e pakico e formadonan no a cumpli cu ley y cu si ta e caso cu a cumpli, anto e ora di con te ainda ta wardando ariba un decision di sr. de Meza ?

   E tardansa aki den nombra un di 7 minister ta tumando demasiado largo y ta creando un irresponsabilidad di parti di e formadornan pa tin un gobierno competente pa atende cu e responsabilidad cu un gobierno digno mester por asumi. Ya ta bay pa 5 luna cu e resultado di eleccion ta conoci y ainda e gobierno aki no por caba di keda completa pa asina asumi su responsabilidadnan.

  E cartera di infrastructura ta asina importante pa e desaroyo di nos economia. Maneho di e propiedadnan di ex refineria ta asina crucial den e desaroyo di e area pariba di nos isla y muy en especial pa San Nicolas, mas ainda e desaroyo grandi cu ta activando awo cu e hotel ta bay habri pariba y cu e vision di un “San Nicolas Cultural and Heritage City” cu ta hayando bida conforme e vision treci dilanti pa e ex minister di Turismo, Cultura y Infrastructura y actual parlamentario pa PPA, señor Otmar Enrique Oduber.

  Di otro banda tin tur comprension pa sr. de Meza cu kier claridad y tin e derecho tambe di haya un trato husto y conforme e espiritu di leynan. Ley mester sirbi pa duna proteccion y siguridad legal pero tambe mester ta husto y cumpli cu su meta. Ley nan no ta worde crea pa worde uza den perhudica un persona of pa worde interpreta subhetivamente. Mescos mester respeta institutonan y spera di nan tambe cu nan ta actua na un forma ehemplar y obhetivo.

  Durante e siman aki e carta lo sali pa asina e formadornan por trece claridad riba e proceso hiba. Cu si esaki a bay conforme ley y cu si a cumpli cu e ley cu e propio ministernan actual a acorda como ley na 2021 ora na tabata asumi e cargo di parlamentario, incluyendo den e caso aki sr. de Meza cu tambe a vota na fabor di e ley aki. Fraccion di PPA ya caba na cuminsamento di e proceso aki di screening a mustra riba e hecho cu e ley ta bay hopi leu y cu un evaluacion y reconsideracion di no solamente e ley aki ta na su lugar, pero tambe di e ley di “kiesverordening” cu no cuadra cu e necesidadnan actual di 2025.