Aunke a inverti hopi placa den Wardacosta toch e Cutter Panter di Aruba tin diferente problema

Relato anual 2024 di Wardacosta ta divulga

ORANJESTAD (AAN): Riba Diabierna, Wardacosta di Caribe Hulandes a publica nan relato anual di 2024.  Aki ta poni cu Wardacosta a inverti aña pasa hopi mes pa duna les y train su personal.  E meta ta pa e aña aki sigui crece pa un organizacion cu por opera 24/7 independientemente.  Pa esey ta creando 70 cupo di trabao extra.

   Pa transforma su mes den un organizacion di 24-ora ta indica cu Wardacosta lo ta operando continuamente, hasta pafo di situacionnan di emergencia y urgencia.  E desaroyo aki ta exigi un inversion extra den personal y material .

   Meta ta pa bay traha via di loke ta ser yama ‘Intelligence Guided Policing’ (IGP).  E ta basa riba acumula rapidamente informacion, tratamento, enrikecimento y analisis di e informacion, y tur esey den e marconan legal.

   Como administrador y responsabel di e presupuesto, Defensa Hulandes ta responsabel pa Wardacosta di Caribe Hulandes.  Ademas, Defensa tey presente den Caribe cu un barco stationschip.  Riba esaki, Wardacosta tambe ta nabega cu nan.  Den e prome parti di aña pasa sinembargo no tabatin stationschip presente.  Esey a bin debi cu Marina Hulandes tabata mas bien dirigi nan atencion riba Lama Mediteraneo y Lama Cora pa diferente mision militar.

  Pa colmo, segun e relato anual, Wardacosta di Caribe tabatin problema cu e patruyeronan rond di e islanan, esta e ‘Cutter’ nan.  Debi na scarcedad di personal y dificultadnan tecnico, no tabatin hopi dia cu tabata nabega rond di e islanan.  Esaki tabata specialmente berdad den e caso di e Cutter ‘Panter’ cu ta esun cu ta nabega rond di Aruba.

   Segun e relato, e comienzo di e trayecto pa reemplaza e Cutternan tabata wordo considera un di e proyectonan di material mas importante di 2024.  Fuera di esey, e proyecto pa amplia e capacidad di Marine-Radar rond di Islanan Ariba tambe a start aña pasa.

   Manera ta conoci, Wardacosta di Caribe Hulandes ta e seccion maritimo den e cadena di mantene ley y seguridad rond di e islanan Caribense di Reino Hulandes.  Nan ta haci tarea pa Aruba, Curaçao, St. Maarten, y e entidadnan publico di Bonaie, St. Eustatius, y Saba.  Wardacosta ta suministra servicionan di Search and Rescue.  Pero tambe ta haci trabao pa detecta y vigilancia y e lucha contra traficacion humano, contrabando di droga y hende, y inmigracion iregular.