Precise Construction a regala un bunita baño pa muher y homber na S.V. Stars Baseball Organization

ORANJESTAD (AAN): Stars Organization ta orguyoso di inaugura nan baño nobo na e veld di Starsfield, y Diadomingo esey a wordo haci na un forma oficial.

   Esaki ta un logro importante den e desaroyo continuo di e tereno di Starsfield.  E ceremonia di inauguracion a tuma lugar den presencia di coaches y famia, team leaders, algun peloteronan, voluntarionan y e compania cu a patrocina e proyecto, Precise Construction N.V.

   E facilidad di baño moderno, cu ta patrocina y construi completamente pa Precise Construction N.V., ta resalta e compromiso continuo di Stars Organization pa mehora e experencia na e compleho pa henter e comunidad di atletanan, fanaticonan y bishitantenan.

   Durante e ceremonia, Starsfield a ricibi oficialmente e yabi di e facilidad nobo. Sr. Elwin Rincones, Presidente di Stars Organization, ta gradici Sr. Youvraj Sharma y su team di Precise Construction N.V. pa e trabao magistral y profesional traha p e veld di baseball Starsfield.

   E tipo di inversionnan aki ta embeyese como tambe agrega mas balor na Starsfield.  Starsfield ta un campo di baseball cu ta den desaroyo continuo, y e organizacion ta celebra un di e metanan logra. Ta spera cu e facilidad nobo ta sigui motiva atletanan pa hunga y practica nan deporte di baseball na Starsfield. 

Sr.Rincones a pone enfasis riba importancia di sosten di comerciantenan local, señalando cu ta e tipo di inversion nan aki ta haci posibel cu Starsfield por desaroya na un campo di baseball di alto nivel.

   Stars Organization ta mas cu agradecido na Precise Construccion N.V., Sr. Sharma, famia y team completo cu a contribui na realizacion di e facilidad aki.