Victimanan awor ta demanda Royal Caribbean
ORANJESTAD (AAN): Manera cu DIARIO a raporta na luna di Februari 2024, un dama cu su dos yiu muher hoben a subi abordo di e barco ‘Symphony of the Seas’ di Royal Caribbean na Fort Lauderdale, pa un viahe di 7-anochi cu lo haci bishita na Aruba caminda nan tabata planea pa goza di e beachnan blanco y lama bunita.
Riba e siguiente dia, esta 25 di Februari, e yiu muher mas chikito net ora e ta usando e baño den nan cabina, a ripara algo straño ora cu el a rek man bao di e labamano pa busca papel di wc. El a mira un camera chikito cu ta dirigi riba e baño. El a core yama su mama cu a bin mira, y mesora nan a yama Guest Services, cu a alerta Security di barco.
Oficialnan di Security a yega, a cuminza investiga, y poco rato despues a detene e Cabin Attendant. El a wordo identifica como Arvin Joseph Mirasol di 34 aña. Mesora nan a cer’e den e cabinanan safe cu tin abordo pa e no sali mas e resto di viahe, te ora cu e barco a regresa Florida y aki el a ser entrega na autoridadnan hudicial. Ora di rista su computer y varios USB Memory Stick, a bin descubri monton di video scondi cu e lo a graba ultimo lunanan di mucha muhernan chikito sunu ta baña. Autoridadnan Mericano ta calcula cu e muchanan aki ta varia di edad di 2 te cu 17 aña di edad.
Na Juni e acusado filipino a admiti su culpabilidad, y a bisa cu e ta pone camera den Cabina di pasaheronan desde cu el a cuminsa traha abordo di Symphony of the Seas na December 2023.
E caso di e Arvin Mirasol a wordo hiba dilanti Corte Federal na Fort Lauderdale, y riba 28 di Augustus recien, US Judge Melissa Damian a duna e castigo maximo di 30 aña di prison. Esaki riba acusacion di ta meti den pornografia infantil.
Tin ainda mas acusacion cu Arvin Mirasol ta pendiente di dje, incluyendo 15 acusacion den Florida State Court pa su envolvimento den ‘Video Voyeurism’. Pues e lo por haya aun mas castigo.
Un caso nobo: Riba Diamars 15 di October, un caso tipo Class Action Civil Lawsuit a wordo entrega na Miami Federal Court y e biaha aki ta contra Royal Caribbean Cruises y e filipino Arvin Mirasol. Nomber di victimanan no ta wordo menciona, y ta ser yama ‘Jane Doe’ cu tabata abordo di e barco crusero.
Den e caso nobo aki, tin chens cu lo por bay divulga cu e cantidad di victimanan ta mucho mas grandi cu a wordo asumi na comienso. Ta menciona cu kizas tin 960 pasahero cu ta victima.
For di 1 Januari 2024 te cu awor, un total di 16 miembro di tripulacion di tur barco crusero a wordo aresta na Wafnan den parti zuid di Florida. Casi tur a wordo acusa di posesion of transporte di pornografia infantil. E cifra halto aki ta un preocupacion pa hopi hende, cu ta sinti cu bo ta bay riba un viahe crusero unda tin hendenan cu mente maligno ta cana rond, incluyendo empleadonan.
