ORANJESTAD (AAN): Como cu Crisis Team tin prohibicion keto bay pa Gym habri na Aruba, por a nota cu algun di nan a dicidi na cuminza haci nan ehercicio pafo den aire libre.
Y esaki ta algo cu un profesor di Harvard University School of Public Health a confirma tambe. Haci ehercicio pafo ta mas safe compara cu training paden di un Gym durante e pandemia di Covid-19. Esey ta loke profesor I-Min Lee a bisa.
Pafo, e chens ta mucho mas grandi cu cualkier potencial virus den aire lo disipa. Pero toch e ta indica cu esnan cu ta haci ehercicio pafo, tin di keda mantene protocol y reglanan sanitario, manera usa un tapaboca, mantene distancia di otro hende, y frequentemente desinfecta bo mannan.
Den fin di siman durante oranan di anochi, por a mira algun persona para leu for di otro tabata haci nan ehercicio cu hisamento di peso, riba un parkinglot na Dakota. E personanan tabata keda leu for di otro, ta hisa nan barbel na un forma safe y leu di otro, den aire libre y sin cu nan ta keda aglomera riba otro.
E ta algo admirable, aunke ta conoci cu na otro lugarnan, Polis y DVG a prohibi e ‘setup’ cu algun Gym a traha pafo di nan edificio, cu toch ta keda cu e posibilidad di aglomeracion.
