ORANJESTAD(AAN)- Manera DIARIO a adverti for di 2018, mundo tabata enfrenta cambionan cu tabata exigi bon gobernacion. Uno di e cambionan mas grandi pa loke ta trata poblacion mundial, lo a conoce un culminacion durante
e prome 25 aña di Siglo 21 y lo tabata directamente relaciona cu e cambio di generacionnan, cu lo a topa otro como competencia riba e mercado laboral entre otro.
E avance di ciencia medico a haci cu hende por a keda activo na un edad mucho mas halto cu antes tabata e caso mientras bida lo a bira mas largo.
Esaki ta nifica, cu e cantidad di hende di edad mas halto lo a subi mientras e cantidad di hobennan cu mester a drenta y domina e proceso laboral, lo a baha debi na famianan mas chikito den epoca moderno.
E mercado laboral lo a conoce un situacion, den cual hobennan mester cuminsa traha pero ya e generacion mas grandi no ta retira, pero ta keda na trabou.
E herencia cu e generacion di despues di guera lo a entrega na hobennan sinembargo, mester a wordo adapta na condicionnan nobo cu lo a nifica menos trabou debi na e culminacion di e Era di Inteligencia Artificial, den cual informacion artificial, acumula den banconan di informacion, lo a exigi cambio riba tereno laboral.
DIARIO a bati alarma na 2018 cu gobierno Mike Eman no a prepara Aruba pa loke tabata na caminda.
E problema mas serio pa hubentud tabata cu na luga di reserva, Gobierno Mike Eman a laga atras un debe nacional y e peso di PPP pa e generacion nobo, cu no a ricibi un economia ni situacion financiero duradero sostenibel, cu hasta e Acuerdo di Nacionnan Uni pa mundo na 2030 ta exigi.
Na luga di a haya placa pa adapta na e futuro sumamente dificil, hubentud a hereda di Mike Eman un proyecto refineria, cu no tabata sostenibel debi na e problemanan cu ya Citgo tabata tin mundialmente.
Pues Citgo no tabata un proyecto cu por a considera duradero, debi na e realidad di Venezuela y di PDVSA cu for di 2017 ta agonia mescos cu Citgo, cu Donald Trump mester a tene for di man di Rusia y tur compania cu Citgo debe placa.
Lo a uza un refineria bieu, pasobra un Citgo carga cu debe te awe, no por a reemplasa tur loke mester a reemplasa.
E placa cu Mike Eman a uza pa haci propaganda pa su persona cu 1.6 Miljard Florin, tabata necesario pa crea e infrastructura cu lo a crea trabou pa tur pagado di belasting, cu Mike Eman a condena na paga e debenan di PPP cu no a genera placa.
Gobierno Evelyn Wever-Croes a mantene Aruba cabes ariba awa pa sigura cu hobennan por lanta nan buelo despues cu un pandemia tambe a presenta.
Awe acento mester wordo pone riba hobennan, cu tambe mester habri nan caminda cu ayudo special di tarifanan ahusta di belasting sigur pa compania mediano y chikito y asistencia cu DIARIO semper a solicita for di 2018, ora nos a bati alarma pa e cambionan mundial cu por a spera.
Durante e gobernacion di Wever-Croes a mira e responsabilidad di Gobierno pa un generacion nobo, cu por gana nan pan di cada dia y asina tin entrada tambe pa paga e debenan cu Mike Eman a laga atras.
Nos bista ta dirigi riba proyectonan importante manera Eagle LNG y un refineria nobo cu sosten di Gobierno Mericano mientras turismo ta recupera a base di cambio.
Manera for di basta tempo DIARIO a splica, turismo tambe lo nifica cambio, cu awe e coronavirus nobo a adelanta.
Sector di turismo mester ta prepara pa e generacion nobo, cu exigencianan cu no ta di e demanda di e generacion di mas edad, cu awe mas cu nunca Covid-19 a stroba di biaha prome cu nan edad lo no a haci biahe posibel mas.
DIARIO a informa su lectornan a base di realidad mundial cu DIARIO ta sigui cu su conexion cu tur parti di mundo.
Awe porfin por mira pasonan pa e generacion nobo por lanta su buelo pa un porvenir nobo, cu hobennan mester edifica den un pandemia.
Proyectonan cu un infrastructura y cu ta produci y no ta abusa di placa di Pueblo, ta wordo anuncia. Alivio di belasting ta wordo duna. Palabra y mas palabra bunita ta wordo reemplasa cu un base concreto cu ta permiti e hoben habri su caminda di bidi den un tempo dificil.
