Otmar Oduber di PPA:
ORANJESTAD (AAN) Otmar Oduber, lider di e Partido Patriotico di Aruba (PPA), den conferencia d prensa reciente, a toca e tema di Aruparking.
Oduber a referi na un Aruparking cu a sirbi su proposito na cuminzamento “pero, lamentablemente, pa motibo di politica, a perhudica e compania aki, un despliegue di inversionnan cu a wordo haci, capital en grandi, pa motibo di politica, unda cu diferente gobierno tur a purba haci di Aruparking algo positivo pa e centro di nos ciudad, pero a keda boicotea esaki. Cada Minister di Transporte a reconoce cu esaki tabata importante y e ta algo cu, naturalmente, den futuro nos ta bay encarga di dje pa percura cu esaki por opera, corigiendo por ta e foutnan cu tabata tin pero hibe bek na un compania solido manera cu e tabata ta, inicialmente”, Otmar Oduber a señala.
El a agrega cu Aruparking tabata genera riba dos miyon florin na entrada adicional di su gastonan di operacion, pa Arubus.
“Di otro banda, awe ta un momento special pa motibo cu den e setting cu mi tabata transmiti informacion na comunidad di Aruba, atravez di e Plataforma Pais, desde awe nos ta comberti Plataforma Pais den un ‘think tank’ di Partido PPA, por lo tanto, den e proximo rueda di prensa, nos dilanti, como Secretario General di e Partido nos lo ta dunando informacion hunto cu coleganan y otro miembronan di e partido, den un setting representando, naturalmente e partido orange, partido di tradicion cu a conoce temponan di Gloria, pa unifica y fortifica e pueblo aki, cu desde otro siman nos lo cuminza nos ruedanan di informacion, atravez di Plataforma di Partido Patriotico di Aruba, pa di e forma aki sigui uza e Plataforma Pais, pa loke ta trata e ‘think tank’ di e partido”, Oduber a subraya,
