Frances Rugebregt ta confirma:
- Door di algun servicio di estetica na Aruba
- Ta boga pa hendenan haci denuncia
ORANJESTAD (AAN) Mas reaccion drentando riba e informe di DIARIO publica recien.
Awor ta Frances Rugebregt, di Inspeccion di Salud Aruba (IVA), den entrevista cu DIARIO, a menciona cu enberdad tin hopi lugar di estetica na Aruba, y por ta e caso berdad, cu cosnan ta por bay robes.
Rugebregt a bisa cu den e caso aki, e ta boga pa si algo bay robes cu un persona, e duna su keho, pero ta importante pa sa si esey cu ta dune tratamento, enberdad ta traha na Aruba, cu e tin su papelnan cu e por duna e servicio cu ta rekeri di dje. El a subraya cu esaki ta hopi importante.
El a agrega cu e remedi cu nan ta uza ta hopi caro y botox ta un ehemplo di esaki. Y si na un lugar ta duna un prijs hopi abao, esaki ta un alerta pa bisa cu un tratamento asina, no por ta asina barata.
“Haci nan preguntanan, puntra si nan registra na AruBIG, p’asina por preveni esaki tambe”, Frances Rugebregt a menciona.
El a confirma cu no tur hende na Aruba mag duna angua. Esaki ta exigi estudio y experiencia y si un persona cu no tin esaki ta duna angua, e ta contra ley y por haya un boet. “Nos ta haya meldingnan tambe di vez en cuando, y nos ta trata nan tambe e ora ey. Nos ta parti boet” Frances a indica.
E ta keda importante pa tur hende cu tin keho melding tambe y e ta algo severo. “Cosnan por bay hopi robes, si bo no mag duna angua, no haci esaki tampoco”, e dama a reitera.
“Dus, check bon e personanan unda bo ta haya bo tratamento, y tambe ta sigur cu e dunador di cuido mes tin nan papel den orden”, el a remarca.
IVA ainda ta haya kehonan, y Frances Rugebregt ta bolbe pidi por fabor meld, pasobra no ta solamente yuda mehora esaki na Aruba, pero tambe e ta yuda pa no pasa cu mas persona. El a reitera si pa wak si e persona ta inscribi, pasobra ta mas hende cu ta duna e servicio aki y ta importante pa e ta safe.
