Prueba cu ignora advertencia por conduci na horor y morto
*Prevencion di calamidad ta e trabou cu hasta ta causa bofon
*Teamnan di rescate tambe ta yora morto di nan miembronan heroe
ORANJESTAD(AAN)—E hecho cu naturaleza aparentemente ta tuma venganza pa loke e mester a soporta na man di e ser humano, ta haya su expresion den cambio di clima.
Productornan natural di calamidad, na 2024 ta duna prueba di e realidad, cu naturaleza por produci mas forza destructor, cu hende cu tur arma cu ta wordo uza den guera.
Esaki no ta nada straño pasobra armanan fabrica pa hende, ta basa riba elementonan basico di naturaleza cu hende kier copia pero no ta logra.
Si den un edicion wordo publica cu un bom nuclear lo rementa na un lugar, tur hende ta bay sconde pasobra nan tin miedo pa perde nan bida.
Sinembargo, ora advertencia drenta cu tin un sistema peligroso na caminda pa un pais, bofon ta wordo haci di expertonan cu mester realiza estudionan considera esnan di mas pisa riba tereno cientifico pa evita cu hende ta bira victima di manifestacionnan di naturaleza.
Pa presenta condicionnan di tempo, ta uno di e trabounan mas mal agradecido pasobra ta continuamente mester observa condicion di tempo, di un nubia cu ta parce inocente na cielo te velocidad y direccion di biento pa menciona algo riba e lista largo.
Servicionan Meteorogico continuamente ta ocupa cu informacionnan cu mester percura pa un comunidad no wordo sorprendi pa laman bruto y olanan sin piedad.
E siman aki lamentablemente na Merca, caminda meteorologia ta parti di bida, naturaleza a causa un destruccion cu ta exigi periodismo lanza e pregunta, si ta berdad cu advertencia contra peligro di naturalesa, mester yega na un fin pa asina no cansa cabez di hende, cu ora problema presenta si ta bay busca hende pa culpa.
E siman aki ta cera na Merca cu resultado di e desastre causa pa Horcan Helene na e parti Zuid Oost di Merca.
Te ainda mas morto por wordo registra pa sigui aumenta e total di 215 persona cu lo a perde nan bida.
E cantidad ta sigui crece, mientras di tur parti mester a aporta cu articulonan necesario pa e poblacionnan di lugarnan afecta, por a haya sikiera awa pa bebe mientras nan tabata yora hende y pertenencia cu a bay perdi.
Loke a pasa e siman aki na entre otro e estado di North Carolina, cu ta e estado cu mas a sufri di e pasashi di horcan Helene, no ta excepcional den temporada di horcan, cu ainda no a termina.
Despues cu Augustus a crea e impresion cu cientificonan a duna informacion robez y cu temporada di horcan lo duna a crea tanto desastre manera a adverti, September tambe a cera cu loke ta presenta awe na October.
E calor inmenso cu ta reina na Aruba ta prueba di e realidad di clima cu no conoce clemencia y ta manifesta su mes den horor cu te awe hende no kier acepta como nan responsabilidad y hasta e forma con den un rato nan por destrui hende y tur loke hende a construi y logra den su bida.
Kende lo percura pa tur cu a keda sin un cas, haya un vivienda nobo? Cuanto hende a keda sin auto? Con ta bay cumpra television, cama pa drumi ariba, auto nobo?
Manera semper nos a trece dilanti, informacion di tempo ta uno di esnan mas importante den periodismo pasobra e ta atende directamente cu loke ta bienestar di hende, cu mester ahusta su bida y su buskeda di salud na condicionnan di clima.
Periodismo ta basa riba e balor di hende, cu meste ta bon informa riba tur loke ta trata su bida, pertenencia, responsabilidad.
Esaki ta haci cu awe contesta mester wordo duna na tur cu ta stroba otro di proteha nan mes contra peligronan natural, loke ta causa cu hende ta perde nan bida den condicionnan cu por wordo preveni, si no hunga super poderoso y acepta cu prevencion ta evita loke den un rato por destrui tur logro.
Felicidad ta hende ta depende di tur loke hende mester den bida cu no ta facil, pero si a bira mucho mas facil pa motibo di formulanan di prevencion cu ta permiti hende cuida su bida, propiedad y bienestar riba tur tereno.
Periodismo mester honra bienestar di hende pero tambe mester respeta cu cada hende ta dicidi pa nan mes y hasta por haci bofon di informacionnan di condicionnan di tempo, cu a entrega prueba cu no mester di guera mundial ni pandemia pa mira hende yora si nan sobrevivi!
