ORANJESTAD (AAN): Post Aruba N.V. ta informa comunidad Arubano cu desde 29 di Augustus 2025 lo drenta na vigor un Orden Ehecutivo firma door di Presidente Trump,
cu ta elimina mundialmente e excepcion di impuesto (de minimis) pa pakete cu ta drenta Merca cu un balor menos di US$ 800,-.
Kico e cambio ta nifica?
Tur pakete cu tin un balor menos di US$ 800,- awor lo mester paga impuesto. Esaki por ta den forma di un ‘ad valorem duty’ (suma cu ta abase di e balor di pakete y su pais di origen), of na forma di un tarifa fiho entre US$ 80,-/ US$ 200,- pa articulo den un periodo transitorio di seis luna, dependiendo di e tarifa aplicabel.
Excepcion di impuesto ‘de minimis’ ta aplicabel unicamente pa corespondencia personal (carta) y pa regalo cu un balor di menos di US$ 100,-.
Reaccion di Post Aruba NV
Pa garantisa claridad y confiansa den e proceso di envio y Aduana, ta suspende temporalmente envio di pakete di mercancia of producto pa Merca, cuminsando dia 27 di Augustus 2025. Post Aruba N.V. ta den combersacion cu Union Postal Universal pa asina desaroya un proceso adecua pa e necesidadnan di nos comunidad.
Ta compronde e impacto operacional y financiero cu esaki tin riba e cliente individual y corporativo; y ta nan obhetivo pa brinda un solucion sigur y efectivo. Asina cu yega na un acuerdo cu Union Postal Universal, lo comparti comunicacion cu comunidad.
