Post Aruba a emiti serie di stampia di Flamingo

ORANJESTAD (AAN): Diabierna dia 29 di april, 2022, Post Aruba N.V. ta emiti un serie di stampia titula ‘Flamingo’.

    E ciudadano Gregory M. Peterson a saca e potretnan usa pa e emision aki, cu ta consisti di 4 stampia, y Sr. Elvis Tromp a diseña e envelop di prome dia di emision y stempel.

    Tocante Flamingo: Tin cuater especie di flamingo na e continente Americano (incluyendo Caribe) y dos especie nativo di Africa, Asia y Europa.  Usualmente flamingonan ta para riba un pia, mientras e otro ta keda scondi bao di e curpa. Nan tin e capacidad pa bula.  Ta corta e halanan, pa asina preveni cu e flamingonan den cautiverio por scapa.

    E flamingonan hoben ta nace cu pluma color shinishi-cora, pero esun di e adultonan ta varia entre roos cla te cu cora fel door di e bacteria y beta-carotene cu nan ta ricibi den nan cuminda. Un flamingo saludabel y bon alimenta tin un color mas briyante, pues ta bira tambe un pareha mas desea; e flamingo blanco of palido, mayoria bes ta mal nutri. Flamingonan den captividad ta un excepcion notabel; nan por bira roos palido si nan no ta alimenta nan mes cu e mesun nivel di carotene compara cu esnan den nan habitat natural.

   Flamingo ta alimenta su mes cu cabaron y alganan blauw-berde, tambe cu larva di insecto, insecto chikito, molusco y crustaceo, cual ta haci e parhanan aki omnivoro. E pik ta specialmente adapta pa separa e lodo y tera for di e cuminda cu nan ta come y nan ta uz’e  unicamente di ariba bay abou. E proceso di filtra e cuminda ta tuma luga cu asistencia di structuranan di cabey, cu nan ta yama ‘lamellae’ y cu ta cubri e cachete y e lenga grandi cu un superficie grof.

   Nan ta considera flamingo como un parha hopi ruidoso cu zonido y vocalisacion variando for di gruñamento te cu zonido nasal. Vocalisacion ta hunga un rol importante den reconocemento entre mayornan y  e yiunan, durante exhibicionnan ritual y pa tene e gruponan hunto.

   Flamingo ta un parha hopi social; e ta biba den colonianan cu populacionnan di hasta miles di flamingo. E colonianan grandi aki ta sirbi pa tres proposito: evadi predador, maximisa cuminda y pa uza e neishina cu ta scars, na un manera mas eficiente.

   E serie aki ta obtenibel na tur oficina di Post Aruba, respectivamente na Oranjestad y San Nicolas y tambe riba e online stamp shop di Post Aruba cu ta:

www.postaruba.com/stampshop

   E bunita serie aki no por falta den bo coleccion. Busca esun di bo awe mes, ya cu e cantidad ta limita.