Presidente di Staten Edgard Vrolijk:
ORANJESTAD (AAN) – Dialuna proximo, dia 2 di Mey, un delegacion di Parlamento di Aruba lo ta viahando pa Sint Maarten, pa participa den e conferencia grandi di IPKO.
Presidente di Staten, mr. Edgard Vrolijk, a elabora riba e tema aki den conferencia di prensa di Dialuna cu a pasa.
Vrolijk a bisa cu e simannan cu a pasa, fraccion di MEP a atende cu hopi reunion cu stakeholders, y gremionan y entre nan mes internamente, y e siman aki Parlamento lo mester fiha a un postura kico nan ta kere cu mester wordo cambia, y na kico nan ta para pe, pa loke ta COHO RAft.
Presidente di Staten a agrega cu e lunanan cu a pasa nan tabata tin hopi interaccion cu Curacao y Sint Maarten y nan sa Aruba su postura y pensamento y viceversa.
Vrolijk a subraya cu Aruba ta den un situacion diferente cu Corsow y Sint Maarten; nan tin un COHO y Aruba tin un COHO y un Raft.
“Nos situacion financiero ta diferente. Nos tin diferente caminda unda nos ta fia, nan tin un banco cu ta Banco Hulandes, y esey por haci cu nan por zapatea un poco mas.
Esey no ta kita afo cu nos den COHO y RAft kier wak cambio, y seguramente, pa loke ta e rol di Parlamento, y sigur pa loke ta IPKO. Riba mi persona como presidente mi a añadi e punto aki, como e rol di Parlamento den COHO y RAft”, Parlamentario Edgard Vrolijk a señala.
Vrolijk a agrega cu no por para keto pa wak cu Gobierno Hulandes, y Gobiernonan di Aruba, Sint Maarten y Curacao ta negosha, na unda cu Parlamento su rol ta bira practicamente nihil pa locual ta trata su funcionamento y control di presupuesto, etc.
E presidente di Staten a agrega cu pa Parlamento ta hopi importante pa debati na nivel di Reino, pa asina Hulanda wak den ki direccion Aruba kier wak y ki cambionan Parlamento kier mira.
Edgard Vrolijk a menciona cu COHO ta mas dificil pa delinea pasobra eynan tin tres pais cu mester tin consensus cu otro, y e RAft ta Aruba so. El a splica cu RAft ta e normanan cu tur instancia, manera Raad van Advies, Raad van Staten y tur gremionan tur ta papia di cifra y normanan irealistico, y Hulanda ta sigui insisti cu e normanan ey.
“Corda bon, nos situacion financiero ta peor cu na 2018; e pandemia a laga nos na werki compara cu 2018, y nos a uza un norma diferente. Hulanda ta haci manera ta ‘business as usual’ nos a djis sigui bay na presupuesto balansa, un surplus di 1%, sin tene cuenta con vulnerable nos situacion economico ta. Esey ta punto cu sigur nos lo debati na Hulanda, y asina tin mas punto”, Presidente di Parlamento, Edgard Vrolijk a señala.
