ORANJESTAD (AAN): Diamars atardi Sindicato STA a forma parti di stakeholders tambe cu a reuni cu Formador di Gobierno y futuro gobernantenan, riba e asunto di wishlist cu nan tin.
Sindicato STA a haci entrega di 17 punto di deseo cu nan lo kier pa Gobierno bin cune pa Aruba, incluyendo cambia e maximo ora di trabao pa tur hende na 40 ora pa siman.
Riba pregunta di DIARIO na Diego de Cuba, encuanto cualkier detaye inusual cu nan a tende den e reunion, el a bisa cu tabata un pregunta di e lider di Partido RAIZ, cu a fula tera cerca nan riba e asunto pa introduci ‘zwangerschapverlof’ pa e tata tambe. Pues no djis e mama ta haya liber ora e duna luz, sino e tata tambe ta haya liber pa yuda na cas. Aworaki e tata ta djis haya 2 dia liber, pero nan lo kier haci esey mas hopi, esta 6 siman di zwangerschapverlof.
Segun De Cuba, nan tambe a remarca cu e 2 dia liber ta hopi poco. “Pa e hende hombernan, cu kico bo por yuda bo señora cune cu apenas 2 dia liber. E criatura a caba di nace! Nos ta kere cu den esaki tambe tin di investiga y bin cu un cambio pa asina e tatanan tin mas tempo cu nan por ta hunto cu e pareha of casa, pa asina atende e baby,” e lider sindical a bisa riba pregunta di DIARIO.
“Pasobra e prome simannan y luna di parto, semper ta basta duro. Y esey ta un di e preguntanan cu esnan formando Gobierno a haci na nos Sindicato,” de Cuba a bisa.
El a bisa cu Sindicato STA ta completamente di acuerdo pa bin cu un cambio den e ley ey, pasobra e 2 dia actual cu e tata ta haya, berdaderamente ta yega pa nada. Prome dia ta yude ora di duna luz, e otro dia ta bay yuda inscribi e mucha na Censo, y ya caba e dianan liber a caba. E ora ata siguiente dia ya tata ta bay trabao, y lagando e señora keda su so cu e baby na cas. Cu suerte e mama lo por haya yudanza pa hende bin duna un man na cas.
Diego de Cuba a finaliza bisando: “Mi ta kere cu lo ta mas bunita pa e casa of pareha ta hunto cu e mama den e prome simannan di e nacemento di criatura.”
