Abuso sexual mester bira topico di discusion na tur nivel di comunidad - *Den tempo moderno mester habri wowo pa un problema serio den comunidad - *Mucha, trahado, homber, muhe ta bira victima di homber y muhe cu ta abusa
ORANJESTAD(AAN)—Alarma ta wordo bati pa otro caso di abuso sexual cu menor di edad. Prensa a haya un articulo cu ta atrae atencion. Publico a haya un topico pa bati bleki. Awor kico???
Cada minut cu pasa, na diferente pais un hende ta bira victima di abuso sexual den un mundo cu cincuenta aña pasa a grita “Make Love not war” den huma di droga, mientras dos artista tabata comparti un camber di hotel.
Un moral nobo a conkista e mundo di jet, di set cu porfin a uni den jetset mientras grupo di defensa di tur causa cu hende por idea, a cuminsa mira luz.
Un realidad nobo y un reto grandi pa normanan y balor a nace den un mundo di hipocrecia. Esaki ta e motibo cu awe rond mundo, mucha y tur hende cu no tin voz, ta bira victima di abuso.
Awe mucha ta yora atrobe na man di homber, cu a uza nan como obheto sexual. Na varios ocasion nos a analisa e tema aki, cu tin tanto aspecto y ta bira un siboyo dificil pa atende.
Mester pone castigo pisa contra abuso di menor di edad. Completamente di acuerdo. Menor di edad di ambos sexo, cu na hopi pais na mundo, mayornan mes ta uza como obheto sexual pa haya placa pa cumpra un auto, bay cu vacacion of cumpra droga.
Nos ta presenta e punto aki, pa directamente exigi atencion pa un problema cu ta afecta muchanan inocente, mayornan decente cu kier duna nan yiunan lo miho y ta keda cu un curason destrui ora nan yiu bira victima di abuso sexual.
Punto pa punto nos kier analisa y si ta necesario dedica un rubrica na e obheto aki pa hunto cu lectornan trece cambio cu ley no por trece ni maske cuanto nos cambia castigo.
Pa por yega na resultado concreto na interes di tur cu ta victima di abuso sexual boca cera, nos mester puntra nos mes kico ta abuso sexual y kico ta duna ocasion na abuso sexual.
Abuso sexual ta basa riba hamber pa relacion sexual, cu un tempo tabata mara na reglanan diferente for di awe. Mundo a libera sex, cu ta uno di e productonan di mas benta na mundo.
E generacion cu a libera sex, awe tin nieto. Si tene na consideracion cu hende a sigui libera sex y un mucha ta bisti sexy for di momento cu e nace, nos mester comprende e problema grandi cu nos ta aden.
Hende a perde control riba su mes. Cincuenta aña pasa, hende ta baila un meter for di otro. Tur luz ta cende durante fiesta, cu control riba loke ta pasa.
Den e mundo cu a cambia, pushi ta cuida pisca. Tur regla a wordo cambia.
Hamber pa sex ta wordo crea den un comunidad, cu ta crea victima.
Esaki ta hiba nos na e punto final pa e analisis di awe. E victimanan silencioso di loke mundo ta adora cu ta sex cu ta produci placa pa pelicula, blusa, short, etc. etc. ta e persona sin forsa cu no por defende su mes.
Un mucha cu ta wordo abusa dor di un persona cu ta abusa di e confiensa cu e tin. Un trahado homber of muhe cu ta wordo abusa dor di su hefe homber of muhe. Un muhe cu no tin forsa contra e homber. Asina por sigui.
Pa atende cu abuso sexual mester kibra e silencio. Pa atende cu abuso sexual mester cuminsa duna hende respet como ser humano. Pa atende cu abuso sexual mester bolbe na regla, sumamente dificil pa bolbe introduci si den tur sector, no kier realisa cu nada di mas ta bon.
Gobierno mester aumenta castigo pa abuso di mucha. Di hobennan pasobra entre 12 y 18 aña den hopi caso no por papia di mucha. Nos mester habri nos wowo pa loke sigur “teenager” ta considera “sex” cu for di cincuenta aña pasa a wordo glorifica! Nos mester tene na consideracion cu awe pushi y pisca ta hunto den un cu mas cu nunca ta canta “Make love not war”.
