Un asunto sumamente dificil presenta durante reunion Formador y Comercio - *E efecto mental enfrente cierto tipo di trabou a ocasiona importacion trahado - *Pandemia ta expone problemanan serio cu a conduci na problema financiero Gobierno
ORANJESTAD(AAN)—Prome cu Formador Evelyn Wever-Croes a topa cu sector comercial, DIARIO ya a trece dilanti cu ta di aplaudi cu prome cu e formacion di un gobierno nobo bira realidad, e formador ta papia cu tur sector y cu despues na forma abierto comunidad ta wordo informa di tur loke a bini dilanti den e combersacionnan.
Pa loke ta trata e encuentro entre Formador y e diferente organisacionnan di mundo financiero y comercial, DIARIO a indica riba e papel cu Gobierno y gremio comercial ta hunga pa creacion di cupo di trabou na un pais democratico.
Comercio mester ta e prome creador di empleado segun e proceso democratico y gobierno tin como tarea pa crea e base necesario pa comercio por produci suficiente trabou loke ta eleva e nivel di bida di e trahado.
Despues di e encuentro entre Comercio y Formador, e informacion a drenta cu comercio a mustra cu aunke cuponan di trabou ta habri atrobe na hotelnan, industria hotelero tin un problema pa haya trahador riba e mercado laboral di Aruba caminda ainda Gobierno mester duna asistencia financiero na cantidad di persona cu a perde nan trabou pa motibo di Covid-19.
E problema aki no ta algo nobo y ta directamente mara na e punto cu DIARIO a trece dilanti tambe y cu ta mustra cu trabou den gobierno ta wordo considera hopi biaha como un forma pa haya trabou den oficina of sevun cierto “categoria” di trabou.
Ora papia di categoria, no mester bay na un clasificacion cu ni comercio ni gobierno conoce pero na un clasificacion cu mente di trahado y percepcion di comunidad ta crea.
Ta existi un tipo di discriminacion cerca trahadonan mes contra cierto tipo di trabou, cu ta crea bon entrada. Esaki ta hustamente e motibo cu mester importa trahador mientras tin hende cu ta biba di loke Gobierno ta entrega nan mensualmente pasobra nan no tin trabou.
E forma cu hende ta mira cierto tipo di trabou den comunidadnan manera Aruba, ta haci necesario pa un pais importa trahado pa traha e trabou cu e miemro di comunidad no kier traha.
Trahadonan mes ta crea un tipo di discriminacion contra trabou manual cu a afecta no solamente industria hotelero.
E Ley cu tabata regla Ayudo Financiero di Gobierno, semper a exigi pa un persona proba cu e no por haya trabou pero den practica esaki nunca a resulta. Mester bisa si cu durante gobernacion Wever-Croes tabata tin un actitud mas skerpi pero cu awor ta na Pueblo mes pa realisa kico ta pasa.
Tur trabou ta trabou aunke den comunidad sigur chikito y cu mas desaroyo manera Aruba a conoce cu leynan social, tin discriminacion cu ta afecta e pais y ta haci cu hopi bez politico ta dicidi di duna hende trabou den Gobierno aunke e hende no ta cualifica.
Pa por soluciona e problema aki, educacion ta importante. Tur trabou ta exigi cierto conocemento y un persona cu ta traha den lavanderia mester sa kico e ta haci mescos cu un persona na oficina.
Un punto sumamente importante a bini dilanti den e reunion entre Formador y Comercio y mester haya atencion pasobra ciudadano cu nenga traha cierto trabou, ta habri porta pa busca trahado den exterior mientras Pueblo di Aruba mester paga pa asistencia social for di caha di Gobierno, cu mester baha e gastonan di su personal y tambe asistencia cu e ta duna na hende cu ta discrimina cu nan mente contra cierto tipo di trabou.
