ORANJESTAD (AAN) – Minister Dangui Oduber, titular di Salud y Turismo, durante e conferencia di prensa Diahuebs mainta riba tereno di Aruba Ports Authority (APA NV),
el a elabora tambe riba e proyecto di 'Port City', y ademas a informa en breve, riba e master plan cu APA tin pa Barcadera:
PORT CITY:
“Parti di e vision di APA y, conforme cu e maneho cu Ministerio di Turismo kier hiba, ta pa nos desaroya henter e area caminda nos ta para akinan, cu e asina yama Proyecto Port City. E ultimo añanan aki, a haci tur e preparacionnan necesario pa nos por cuminza ehecuta e proyecto aki. E proyecto aki, ta bira un proyecto di un inversion di 500 miyon dollar di sector priva. E entradanan cu ta wordo genera por medio di e proyecto aki, APA ta inverti bek den mantencion tambe den infrastructura, landscaping, y tambe na percura pa e wordo manteni pa e siguiente añanan aki. Nos ta asina leu, cu nos ta yegando e ultimo fase di tur e negociacionnan cu tabata tin cu departamento di infrastructura, pa asina traspasa e ultimo terenonan pa Aruba Port Authority. Ora esaki ta cla lo bay over pa cuminza un destaho publico, pa asina APA por otorga e prome parcela pa e proyecto inicia”, Oduber a indica.
E mandatario a señala cu esaki ta bira un proyecto (master plan) di 15 aña, pero e intencion ta pa retoma e proyecto aki e aña aki. E ta reitera cu esaki ta cuadra cu e maneho cu gobierno ta hibando, di percura pa tin inversionnan, pa crea oportunidadnan nobo.
“E proyecto Port City sigur, ta bay crea hopi oportunidad economico pa Aruba, tambe cuponan di trabao, entrada pa APA y pa gobierno di Aruba. E ta un proyecto hopi importante cu gobierno a traha hopi aña riba dje”, e mandatario a remarca.
Minister Oduber a bisa cu gobierno ta considera APA como un di e NVnan cu tin un potencial enorme pa crea un auge economico cu Aruba mester di dje, despues di dos aña hopi dificil pa e pais.
MASTER PLAN BARCADERA:
Minister Oduber a splica cu APA tambe tin e terenonan na Barcadera, cu pa hopi aña no mucho cos a wordo haci cu nan, y den nan master plan tambe tin un plan specifico pa desaroya henter e area aki den un area di logistica y warehouse. “Dentro di poco nos lo informa comunidad tambe tocante kico ta e plannan specifico pa e terenonan na Barcadera.
“Nos ta convenci cu nos ta mira un potencial enorme den APA pa keda haci e inversionnan necesario y percura pa enfoca riba turismo crusero y e modelo nobo di Real Estate di Port City, y tambe e terenonan cu tin disponible na Barcadera” e mandatario a remarca.
