Delincuentenan cometiendo crimen cu final pasional den propiedadnan di Stichting Rancho

ORANJESTAD (AAN): Diaranson mainta trempan Central di Polis a dirigi su patruya di Playa pa e oficina di Stichting Rancho den Emanstraat relaciona cu kiebro y ladronicia.

   Ora e unidad a yega den Emanstaat, Polisnan a observa cu e hekwerk di un di e portanan a worde tur dobla. Tambe polis a observa y a papia cu e president di Stichting Rancho, esta Clifford Rosa, kende a divulga na agentenan cu e tabata canando ora cu el a mira cu un di e hekweerk di e porta na banda, parti pariba di e edificio ta completamente dobla.  Tambe Rosa a mustra polisnan un otro hekwerk na banda tambe a worde destrui, y cu e porta ta full habri.

   Polis a yega cerca y a mira cu tin dos powertool benta abao bana di e porta ey.  E funcionario Rosa a declara na polis cu su empleadonan no a laga esakinan atras eynan.

   Pafo tabatin un USB Memory Stick na tera.  Tambe e funcionario Rosa a indica na e Polisnan cu tin un microwave oven abao na suela.

   E funcionario Rosa a bisa cu durante dia e lo traha un lista di tur loke a wordo horta.  Entre otro tin un Sony DSLR Camera, un Canon EOS Camera, Samsung Smartphone, y un Seagate Portable Hard Disk Drive.

   Como cu tin indicacion cu tin varios vingerprint, a pidi Oficialnan Forensico di BFTO pa bay haci un investigacion eynan.

   Pero algun ora despues, pa 8:50 am, un unidad di Polis a wordo manda pa check kico ta pasando na e Forno di Kalki den Ranchostraat.

   Ora cu Polis a yega, nan a wordo acerca pa e ciudadano di inicial L.  E persona aki a informa e agentenan cu e kiebro cu a ser ocasiona madruga na Stichting Rancho, a wordo cometi door di e homber cu e conoce como J.

   Un poco despues, Polisnan a papia cu e funcionario Rosa di Stichting Rancho, kende a bisa agentenan cu el a bay tene un control na e Forno di Kalki.  Ora cu el a yega cerca, el a mira con un Adicto Ambulante di inicial M. ta tratando na cera e porta di e Forno na un forma rapido.

   Aki e funcionario Rosa a bay papia cu e Adicto Ambulante M. y a puntre ta con el a yega na e yabinan aki.  Ora cu Rosa a bay den e Forno di Kalki, el a bin topa dos otro persona mas, cu tabata haciendo relacion sexual cu otro.  Mainta trempan y den e calor ey.

   Rosa a reconoce e muher como V. pero no por a reconoce e homber cu color di cuero cla.  Despues e muher V. a basha abao cu e homber cu nan a gare ta haci amor den e Forno, ta di inicial F.

   E funcionario Rosa a bin haya un LED-Lamp den e Forno, cu el a reconoce como un di e articulonan cu a ser horta for di nan oficina di Stichting Rancho.  El a hiba e LED-Lamp aki bek pa e oficina.

   Ora el a regresa na e Forno, e porta tabata na lock.  Ora cu Polis tabatey, e Adicto Ambulante M. a yega cu un boshi yabi, y a habri e candal.

   Aki e funcionario Rosa a pidi e Adicto Ambulante M. pa dune e yabi y candal, y el a cumpli cune.  Despues e funcionario Rosa a bay busca e LED-Lamp y a entrega esaki na Polisnan.  Esaki a wordo confisca na interes di e investigacion y lo wordo entrega na Recherche Oranjestad.