Porfin yiunan di tera cu a specializa den region lo wordo reconoci

Minister Oduber a firma decreto pa registro di AruBIG - ORANJESTAD (AAN): Diamars mainta Minister di Salubridad Dangui Oduber a firma un decreto pa e prome dos profesionalnan wordo incorpora den e registro di AruBIG.

   Esaki ta yuda duna mas oportunidad pa yiunan di tera sigui specializa nan mes den e region.

   “AruBIG ta un proceso cu a cuminza hopi tempo pasa na momento cu nos a drenta gobernacion na 2017”.

   Nos a cuminza cu diferente investigacion pa determina con nos por percura pa realiza un soño cu hopi Arubiano tabata tin, pa reconoce nos yiunan di tera cu ta specializa den nos region, pa nan por drenta nos registro, wordo reconoci y pa por traha na Aruba.
    A cuminza traha cu e landsverordening ‘Beroepen in de Gezondheidszorg, pero e ley aki no tabata uno completo, segun e mandatario.

   El a splica cu pesey ehecucion practico no tabata existi.

“For di e ley aki nos a cuminza haci tur e trabao cu mester a wordo haci pa percura pa tin e decretonan pa e organonan di acreditacion y e decretonan pa e exigencianan di opleiding cu ta hopi importante”, segun Oduber.

El a splica cu a institui un comision nacional di cuido y un di e preocupacionnan cu a wordo treci dilanti e tempo ey tabata e calidad di cuido.

   E intencion tabata pa e nivel di cuido ta equivalente cu e asina yama BIG Registratie Hulandes y segun e minister, DVG a haci un excelente trabao cu e conseheronan di ministerio, pa haci tur e investigacion necesario pa Aruba por tin un calidad di mesun nivel y te hasta den cierto caso mihor nivel cu e registro di BIG.

   “Pesey awe nos ta oficializa e proceso aki, door di duna e decreto aki na e prome profesionalnan cu ta wordo incorpora den nos registro cu ta docter di wowo Nathaly Wolter y terapeuta fisico Nanda Braemer”, segun Oduber.          

Kwaliteitsinstituut

            Minister Oduber a menciona cu e instituto di calidad ta hunga un rol hopi importante den e henter e proceso di arubig. A percura pa lanta esaki y e mester bira un organo independiente y para riba su mes. Gobierno ta den combersacionnan cu AZV pa por logra esaki.

   “Nos no ta acredita tur pais ainda, pero naturalmente nos ta cuminza cu Hulanda, Merca, Canada, Colombia y Costa Rica”.

Actualmente e siguiente profesionnan ta rekeri pa inscribi den e AruBIG:

• Boticario
• Medico
• Dentista
• Partera
• Fisioterapista

Entrante aña 2022:

• Enfermera
• Psicologo
• Psychiater

Diplomanan reconoci pa AruBig

E siguiente diplomanan ta ser reconoci den AruBIG:

1. Pa tur profesion, un number di BIG di Hulanda (Nederlandse BIG-nummer) y registracion como specialista den e asociacion reconoci na Hulanda (p.e. RGS pa medico). BIG registratie.
2. Pa medico alternativamente documentacion cu ta prueba cu a pasa exitosamente e “board exam” di USA (ECFMG) of Canada (Medical Council of Canada) , irespecto na unda bo persona por a studia;
3. Pa medico alternativamente e diploma di e siguiente universidadnan acredita pa medio di e organo di acreditacion SINAES na cual e siguiente Universidadnan ta ser reconoci dor di AruBIG: Universidad de Costa Rica, Universidad Latina de Costa Rica of Universidad de Ciencias Medicas (UCIMED);
4. Pa medico alternativamente e diploma di e siguiente universidadnan accredita dor di e organo di accreditation CNA na Colombia na cual e siguiente Universidadnan te ser reconoci dor di AruBIG: Universidad El Bosque of Pontificia Universidad Javeriana;
5. Pa dentista alternativamente e diploma di siguiente universidadnan na Costa Rica: Universidad de Costa Rica of Universidad Latina de Costa Rica;
6. Pa dentista alternativamente e diploma di e siguiente universidadnan na Colombia: Universidad El Bosque of Pontificia Universidad Javeriana.

Pa estudio local ta conta cu esnan reconoci dor di Directie Onderwijs y/of apunta dor di e Instituto di Calidad ta ser reconoci dor di AruBIG.

Un otro specialismo reconoci dor di AruBIG ta e estudio di specialismo “arts arbeid en gezondheid Aruba” duna pa e scol NSPOH di Hulanda.