Premier Wever-Croes: Aruba a haya mas tempo di Hulanda -- ORANJESTAD (AAN): Un di dos punto riba cual Gobierno di Aruba tin diferente di opinion cu Hulanda,
ademas di e asunto di salario di directornan di companianan estatal, ta un punto mas serio y esaki ta cortamento den gastonan di cuido di salud (AZV), asina Prome Minister Evelyn Wever-Croes a duna di conoce durante e prome conferencia di prensa di Gabinete WCII.
Aña pasa Hulanda a bin cu e exigencia cu Aruba tin cu corta 5 miyon florin den gastonan di AZV. Aruba a bay di acuerdo cu 5 miyon, pero diripiente e 5 miyon aki a bira 5 miyon tur luna, a bisa.
Esey ta algo cu den prome instancia Aruba a protesta y te dia di awe ta protestando keto bay.
Asina mes e aña aki, cu tur e recortenan cu a wordo haci den cuido di salud, a logra corta 40 miyon florin, Wever-Croes a remarca.
El a agrega cu aña pasa a corta 35 miyon florin y e aña aki 40 miyon florin. Pero como cu Cft a bisa cu 40 miyon no ta 60 miyon, Aruba no ta haya placa. "Esey mi no ta di acuerdo cu ne. Mi ta haya ta un actitud, un posicion cu ta intransigente y un posicion cu no ta duna realce ni respet na e seriedad di e situacion cu nos ta aden".
Premier Wever-Croes a laga sa cu aworaki a palabra cu Hulanda pa duna Aruba un espacio mirando cu awor gobierno ta oficial, pa den e dianan aki sigui dialoga pa por sali afo.
El a agrega cu e sosten di likides pa Aruba ta hopi importante, specialmente pa loke ta e subsidio di salario cu ta duna na basta trahador ainda y pa e proyecto di paketenan di cuminda.
Lo sigui na mesa y negocia firme, pero cu e mira pa por yega na un solucion pronto pa asina Aruba por haya e sosten di likides cu ta asina hopi importante.
A palabra cu den e siman aki e dialogo ta continua. Aruba ta haciendo e calculonan pa asina cu Hulanda duna indicacion por sigui na mesa.
E mandatario a laga sa cu e placa lo bira hopi menos di loke Aruba a pidi den prome instante, pasobra cosnan ta bayendo mihor na Aruba. Entradanan ta bayendo mihor di loke a premira. No ta na 100% ainda, pero un poco mihor cu ora cu a haci e peticion. "Pero mi tin tur confiansa cu nos lo sali afo di esaki", a expresa.
