Prome Minister a indica:
ORANJESTAD (AAN): Prome Minister Evelyn Wever-Croes durante su programa Live cu Tanchi Eve a contesta algun pregunta di e publico y un di esakinan ta si por vota cu rijbewijs durante e proximo eleccion.
El a bisa cu rijbewijs ta un di e metodonan valido durante e dia di eleccion cu ta diabierna 25 di Juni proximo. Pero mester ta e rijbewijs nobo, esun cu ta wordo saca na Censo y no esun cu a wordo saca na warda di polis.
El a bisa cu e rijbewijs cu a wordo saca na warda di polis, cu tin un shoco riba dje, ta un rijbewijs cu gobierno anterior a bin cu ne y cu nan tabata sa cu no ta cumpli cu e rekisitonan di ley pa bira un documento legitimo cu ta valido.
A cambia e proceso, durante gabinete Wever-Croes y awor Censo ta esun cu ta emiti'e. Awor e documento si ta cumpli cu tur e rekisitonan di valides pa e ta un documento legitimo y valido, e mandatario a remarca.
Cual ta e 'legitimatie bewijs' cu por uza pa por vota?
- Pasport valido
- cedula valido of
- rijbewijs valido, pero esun nobo
Un persona cu tin un rijbewijs bieu e no por vota cu esey pero e por uza su pasport of su cedula tanten cu nan ta vigente, a enfatisa.
