SANTO DOMINGO: Gobierno di Republica Dominicana a anuncia Diaranson, cu nan ta stop mesora cu importacion di raiz, stengel, bola di rijst, y material pa sembra bacoba procedente di paisnan afecta pa un plaga, entre nan Colombia y Peru.
En total a prohibi importacion di stengelnan di ginger, tambe curcuma, batata cu ta sacando stengel, artesania, y matanan musacea di e paisnan aki, via un ley oficial pasa pa Ministerio di Agricultura.
Republica Dominicana a informa cu inmediatamente nan a reforza e vigilancia na tur waf y aeropuerto, y tambe na fincanan pa asina controla tur mata of producto di berdura cu ta bin di Sur America.
Otro medida cu Gobierno Dominicano a bin cune ta ponemento di tapijt sanitario den salanan di pasahero na Aeropuertonan Internacional, y tambe puertonan turistico na e pais, y tambe pone un arco di tratamento na Waf di Manzanillo pa asina containernan pasa bao di dje y nan wordo desinfecta. Tambe ta start cu campaña informativo pa educa tur hende, y principalmente importador y esnan cu ta traha cu mata of planta bacoba.
Peru y Colombia a wordo afecta pa e plaga Fusarium Foc R4T, cu ta un fungus hopi agresivo contra e matanan di bacoba, causando cu nan ta marchita y ta muri.
E plaga aki ta plama principalmente danki na movemento di material di siembra riba particulanan di tera cu ta keda kizas na keds of zapato di hende, pega na herment, y vehiculonan, of tambe door di rooi di awa cu ta transporta e fungus di un lugar pa otro.
Ademas, unavez cu e fungus aki bay den e sistema vascular di e matanan, e ta causa un colapso den nan mecanismo di transporte di awa y nutriente, loke ta afecta nan fotosintesis y ta pone nan muri.
Te cu awor, ciencia no a traha y no tin nada cu por ataca e fungus aki, pues e unico medida preventivo cu tin awor ta cuarentena, preveni cu e tera afecta of mata, ta move di un area pa otro area.
