PUNTO FIJO: Tabata Diaranson madruga, cu un avion pirata cargando hopi droga, a haci un aterizahe di emergencia den sector di Boca Ricoa na municipio Piritu, cu ta keda na estado Falcon.
Esaki ta na costa di Lama Caribe, na como 71 km Zuid-Zuidwest di Curacao.
E avion cu matricula EMB-810D, ta un Embraer Senica Pipen di dos motor, color blanco cu blauw, y a keda semi-dera den e santo na rand di lama.
Autoridad cu a actua rapido a detene dos homber Colombiano, kende durante interogacion a admiti cu nan tabata bulando e avion. Pues nan tabata riba un ruta pa drop droga, y a haya problema.
E chassis di e avion a kibra den e ditching, pues e avion aki lo no por bula mas. A haya tambe abordo un monton di jerrycan extenso cu combustible abordo, y esey nifica cu e avion aki tabata planea pa bula un distancia basta largo pa drop e droga y despues regresa.
Den decada di 1980 y tambe 1990, Aruba tabatin hopi problema cu avionnan pirata aki cu tabata pasa riba e isla pa drop droga principalmente riba tera cerca di costa panort, y tambe noordoost di Aruba.
Pero e avionnan aki despues tabata haya problema y ta ateriza na Aeropuerto di Aruba, y nunca ta haya sa kende ta e doño. Un monton di avion pirata a cuminza aglomera na un espacio di parkeo banda pazuid di e pista debi na esey.
