Por recicla awa y muha mata awor cu ta temporada di mango

Sylvanio Goedgedrag di PADF

ORANJESTAD (AAN):   Un aspecto hopi importante cu e consultor den salud di Pan American Development Foundation a recomenda tocante e uzo di awa ta cu por haci un mihor uzo di awa tambe ora cu por recicla esaki.

            Ta importante pa sea conciente riba e uzo di awa y algo cu semper por haci ta cu ora cu tin awa cu no por bebe mas, por ehempel, pa uza esaki pa muha mata. Mas cu logico, no por uza e awa di pos pa muha mata of algun palo di fruta, pero si por uza awa pa muha e matanan di mango, cual ta den su temporada.

            Tin diferente mata di fruta cu por crece bon y abundante si ta muha nan cu awa no contamina. El a remarca cu tin hendenan cu toch ta uza e awa di pos pa muha e matanan pero den e caso aki ta recomendabel pa uza algun producto kimico cu por mehora e disponibilidad di e awa, a splica.

            Banda di esaki mester ta cauteloso cu e sanguranan pa asina preveni malesanan manera dengue. Mester evita pa awa keda para pa evita malesa, pero tambe pa tin e cas y rond di dje mas limpi posibel.

            Hopi hende na Aruba sa caba di e sintomanan di dengue cua ta entre e mas comun: fiebre, dolor di curpa, di wowo, nausea/sacamento, rash, dolor di cabes.

            Un persona cu den pasado a haya dengue y cu ta hay'e pa di dos of di tres biaha, e biaha aki ta mas ta mas pisa, a remarca.

            Su mensahe pa loke ta trata uzo di awa ta cu e awa di crenchi ta relativamente safe, pero ta recomenda pa despues di dos dia, herbe e awa pa consumo domestico. Esaki lo evita bira malo door di e bacterianan manera esun di 'Legionella' cu por causa neumonia.