ORANJESTAD (AAN): Despues cu Gobierno di Argentina a suspende pa 30 dia, e exportacion di carni di baca for di e pais.
Awor un planta di empaketa carni na Santa Fe (Argentina), a ordena un ciere temporal di nan planta, y esaki a causa preocupacion entre e trahadornan.
Ta trata aki di e compania Frigorifico Rafaela Alimentos cu tin mas di 650 empleado. E planta aki ta situa na ciudad di Casilda na Santa Fe, y e medida tuma Diaranson, lo dura un luna.
E planta aki ta exporta e.o. carni tambe pa Aruba, y nan decision pa cera a bin despues cu Gobierno a indica cu nan ta cera porta pa tur exportacion pa un termino di 30 dia.
E compania Rafaela Alimentos a bisa cu e media di Gobierno a laga nan cu ningun otro opcion, sino stop operacion. Diaranson tabata ultimo dia cu nan a mata baca pa carni.
Un fecha di reapertura di e planta no a wordo stipula ainda. E planta aki di Rafaela Alimentos tin su principal meta pa procesa carni frieu of di ijs pa mercado di exportacion, y ta ocupa un tereno di 19.000 meter cuadra.
Ademas di Aruba, e compania aki ta exporta carni di Argentina pa Bosnia, Brasil, China, Cote D’Ivoire, Hong Kong, Malaysia, Peru, Rusia, Singapore, Suiza, Union Europeo, y Zuid Africa.
E ta un golpi pa e compania, pasobra apenas na 2019 nan a ehecuta un inversion miyonario pa aumenta nan capacidad productivo y genera mas cupo di trabao na e planta, unda nan ta procesa 75% di carni pa exportacion, y 25% pa mercado local.
Gobierno di Argentina a stop exportacion di carni pa 30 dia, debi na e aumento sosteni di prijs di carni na mercado domestico di Argentina mes, y ta parti di e implementacion di un set di medida di emergencia.
Pero a compronde cu Gobernador di e.o. Santa Fe, esta Omar Perotti a rechaza e decision di Gobierno, y el a mustra cu e “solucion ta pa aumenta produccion y no bay stop exportacionnan.”
Nan no ta di acuerdo cu e decision di Gobierno, pasobra e medidanan aki tuma cu ta contene solucionnan cu no ta funciona, ta djis perhudica e futuro di e industria.
