ORANJESTAD (AAN) — Prome Minister a amplia tocante e 5% cu empleadonan publico ta entrega tur luna, bisando cu Corsow y Sint Maarten a pasa un ley,
y nan a regla nan 12.6% net un poco diferente cu Aruba, y gobierno lo analiza y delibera si tambe por haci un cambio cu por reemplaza e 5% aki.
“Nos na Aruba a bisa ‘dus, laga nos mira compara nan cu nos’. Na Curacao y Sint Maarten Hulanda a aproba pa e ambtenaar no entrega placa di tur luna for di su salario; el a entrega full su vacancy uitkeuring. Aki na Aruba nos a scoge pa mitad di e 'vakantie uitkering' so. Ayanan, nan a entrega dianan di vacacion tambe. Y awo cu esaki ta regla den ley, nos tambe ta bay haci algun calculacion, y mira con nos tambe por cambia e parti di 5% ey cu e ambtenaar ta entrega tur luna, pa e no tin nodi entregue mas, pero entrega parti di dje den dianan di vacacion. Calculacionnan ta wordo haci, y ta wordo delibera riba dje aworaki, pa mira si esey por”, Minister Presidente a duna di conoce.
E dignatario a haya e pregunta si por haci esaki den periodo demisionario, y e contesta ta si por, pasobra esaki ta algo cu ta andando caba, y no ta un asunto cu lo causa problema, pero obviamente mester papi'e cu Hulanda.
“Si Hulanda a aprobe pa Corsow y Sint Maarten, mi ta duda cu nan tin algo di bisa si Aruba tambe lo kier hacie mescos”, Prome Minister a acentua.
El a agrega cu ta hopi importante pa para keto na e cortamento di salario cu ta algo cu no ta gobierno ta insistiendo riba dje, pero e ta un palabracion haci cu Hulanda pa Aruba por haya e sosten di likidez.
“Hulanda ta insisti cu e ta ‘tot nader order’ (te otro aviso). Nos ta evaluando esaki constantemente, y tanten nos ta depende di Hulanda pa e sosten di likidez, nos mester sigui aplica esaki. Ora nos no depende di Hulanda mas nos lo re-evalua y mira con nos ta duna bek nos ambtenaarnan loke nan tabata tin derecho riba dje caba” Minister Presidente a reitera.
Minister Presidente a subraya un biaha mas pa pueblo no laga ningun hende bin gañ'e y bisa cu nan ta yega drenta gobierno y kita esaki mesora for di mesa. “Nan por kite, pero e ora ey nos ta haya nos mes cu cartanan similar na esun cu Curacao y Sint Maarten a haya, cu Hulanda ta cuminza amenaza cu no ta haya e sosten di likidez mas, y esey pa nos esaki ta hopi importante na e momentonan aki, pa asina cada ciudadano por ta trankil”, Minister Presidente a remarca.
