Por inscribi di awor caba pa un workshop di Poesia na September

Duna pa Arturo Desimone

ORANJESTAD (AAN): Ateliers '89 Punto Di Beyas Arte Aruba tin e placer di anuncia “Poesia Escritura” lo ta nan siguiente workshop pa e luna di September. Bao di e guia di e artista multifacetico maestro yama Arturo Desimone.

   Cuminsando Dialuna September 1 pa Diahuebs 25. Cu un presentacion na final di e workshop aki di e obranan concebi. Workshopnan ta di 12 aña pariba y ta riba Dialuna, Diamars y Diahuebs, for di 6:30 pm pa 9.30 pm.

   Pa inscribi por manda un email na This email address is being protected from spambots. You need JavaScript enabled to view it. cu tur bo informacion.

   E artista ta Arturo Desimone.  E lo bay ta un curso multilingual tocante poesía mundial. E instructor pa e curso aki ta e poeta, periodista y artista visual Arturo Desimone.

   E curso ta encera cu tur participante lo ricibi ehercicio y tarea cu ta involucra skirbimento y lesamento di poesia. E alumnonan por realisa nan tarea paden y pafo di e contexto di e tayer.  Lo bay combersa tocante con e multilingüismo di Aruba y su habitantenan por sirbi como bentana pa miho contempla e evolucion di poesia na diferente parti di mundo, durante diverso epoca. Tres encuentro intensivo lo tuma luga tur siman (Dialuna, Diamars y Diahuebs atardi-anochi) riba campus di Ateliers89 na Dominicanessenstraat.

   Tambe lo celebra actividad grupal di caracter mas informal of liber, pafo di horario oficial, por ehempel pa proyecta película tocante poesía y bida di e poetanan.

  Hunto ta bay explora tur elemento di e proceso di creacion poetico, y e trabao envolvi pa alimenta esaki. E meta ta pa yega hopi mas leu cu e formatonan convencional loke a pone limite riba poesia (como e funcionnan tipico parokial, ceremonial of estrictamente localista). E programa di estudio aki ta bay profundisa, concretisa (via di uzo di imagen y simbolo) y amplia e habilidadnan y auto-conocemento di cada integrante.  Lo persigui e florecemento di un mirada panoramico riba nos region, nos isla y mundo. Tur participante lo desaroya un wowo y mente mas critico en cuanto e uzonan di lenguahe den tur aspecto di bida diario.

   E participantenan lo bin den contacto cu texto menos conoci y un bibliografia rico y extenso di poema di tur caminda di nos dushi planeta: un planetario poetico. Alabes ta bay duna importancia na e poder y e arte di traduccion literario, como un forma vital pa fomenta dushi Papiamento. Traduccion for di otro idioma pa Papiamento (y vice versa) ta un herment sumamente importante pa isleño. E participantenan por entrega y declama nan trabao poetico na cualke di e cuatro lenga dominante na Aruba: sea Papiamento, Ingles, Spaño of Hulandes. Nan ta encurasha alumno pa produci na cada ken su “lenga di mama” propio, of na e lenga preferi of e idioma adoptivo.

   Fuera di esey, lo tin chens di conoce varios poeta reconoci di afo, pa via di yamada “livestreaming”, of hasta a traves di un bishita sorpresa “en bibo” pa combersa. E curso aki tambe ta perfecto pa hende interdisciplinario of pa hende cu inclinacion hopi mas visual cu literario, pasobra e instructor Arturo mes tambe ta artista visual cu varios expo internacional tras di dje.

   Manera Pancho Geerman a yega di bisa di cierto buki di poesia: “Nos ta invita bo bin pela cu bo caweta, cautela, perseverancia y dedicacion e contenido y nificacion(nan) di cada poema. Cada un, irespecto idioma, y cada pintura, tin su misterio cu ta pica bo cerebro y bo sintimentonan.”

   Tocante e instructor: Arturo Desimone, naci na Aruba na 1974, ta escritor, artista y traductor literario. Un pasantia na Tunecia a motib’e pa skirbi su prome buki di poesia, e edicion bilingual “La Amada de Túnez / About a Lover from Tunisia” (ed. Clara Beter Ediciones 2019 y African Books Collective 2019),  El a declama su obra poetico na Ingles, na Spaño, ymas recientemente, na Papiamento, durante e siguiente festivalnan internacional di poesia: Festival Internacional di Poesia di Medellin Colombia, e encuentro Festival Internacional di Poesia di Granada, Nicaragua, di Bruselas, di Habana Cuba, y di Festival di Poesia di e Ciudad na Buenos Aires.

   Na 2023 e tabata director artistico di e prome Encuentro Internacional di Poesia na Aruba. “Kibocacion Entre Luz y Boca” ta su prome buki skirbi originalmente na Papiamento, y su di cuater buki di poesia. Esaki a wordo traduci pa Spaño y presenta na e "Feria Internacional del Libro de Buenos Aires" y tambe na e feria internacional di Bogota. Su poesia, prosa y articulonan periodístico na Ingles a yega di aparece den varios revista literario na Merca (New Orleans Review, Latino Review of Books, Drunken Boat), den Caribe (Journal of West Indian Literature, Small Axe Salon, BIM), y na Inglatera y na Oceania (Island, Sydney Review of Books). Na 2018 el tabata finalista di e premio “El Hizjra” pa escritornan inmigrante hoben na Hulanda; consecuentemente e mesun instituto a nomina Desimone pa participa den e tayer “Nieuwe Stukken” pa dramaturgo emergente bou di auspicio di e Nederlandse Podiumkunst Fonds.