Departamento di Impuesto
*E servicio di pago parcial tambe ta posibel
ORANJESTAD (AAN): Departamento di Impuesto ta anuncia cu na e momentonan aki tur contribuyente automobilista por cuminsa haci pago di impuesto di vehiculo di motor di aña 2026. Di acuerdo cu ley, e fecha final pa haci pago ta 31 di januari 2026, pero debi cu e dia aki ta cay den weekend, e fecha final ta bira 2 di februari 2026.
Departamento di Impuesto ta permiti e contribuyentenan pa haci e pago mas trempan, dunando asina mas espacio financiero pa por cumpli cu nan deber fiscal. Manera ta conoci, e automobilista por scoge pa paga su impuesto di vehiculo di motor den un solo biaha of den mas biaha haciendo uzo di e servicio di pago parcial.
Tarifa di impuesto: Pa aña 2026 e tarifa di impuesto di vehiculo di motor ta keda igual cu e añanan anterior. Contribuyentenan lo tin cu paga unicamente e tarifa di impuesto. No tin mester di paga pa e costonan di e plachinan, ya cu e plachinan blauw cu blanco ta valido te cu aña 2029.
Servicio di pago parcial: Pa yuda e automobilistanan contribuyente cumpli na tempo y evita cu na februari 2026 lo mester paga e impuesto den un solo biaha, Departamento di Impuesto ta brinda e oportunidad pa haci e pago adelanta y poco-poco di awor caba. Esaki ta e servicio di pago parcial cu ta conta tanto pa empresanan como personanan priva. Na e momentonan aki e contribuyentenan tin 4 luna di tempo prome cu e fecha final di 2 di Februari 2026.
Haciendo uzo di e servicio di pago parcial, e contribuyente por parti e pagonan durante e lunanan venidero y asina cumpli na tempo.
E sistema di pago parcial no ta obligatorio, pero fuertemente recomenda specialmente pa esnan cu mester mas tempo of tin mas auto.
Condicionnan stipula: E condicionnan pa e servicio di pago parcial ta lo siguiente: (*) Ta paga e impuesto delanta, esta prome cu dia 2 di Februari 2026. (*) Ta haci e pago pa luna. (*) Ta paga e suma minimo rekeri sea 50 Florin of 200 Florin (depende e categoria di plachi). (*) No por paga menos cu 50 Florin a menos cu e debe (restante) ta menos. (*) Ta haci e ultimo pago no mas laat cu dia 2 di februari 2026. E servicio di pago parcial ta valido unicamente pa pago di impuesto di vehiculo di motor.
Pago minimo: Corda bon cu e pago minimo pa luna ta depende den cua categoria di plachi e vehiculo ta registra. Hunto cu e articulo aki por mira e schedule suministra door di DIMP.
Miho Online Banking: Alavez Departamento di Impuesto ta recomenda su contribuyentenan pa paga via e sistema di Online Banking di Aruba Bank, Banco di Caribe of CMB, uzando e metodo di “Bill Payment”. Pagonan haci via e banconan menciona aki ta pasa den e sistema di Departamento di Impuesto den un dia. Pagonan haci via otro banco ta tarda por lo menos 5 dia di trabao pa registra den e administracion di Departamento di Impuesto.
Pa e pagonan online por worde procesa debidamente, ta importante pa inclui e siguiente informacion: (*) Persoonsnummer na cual e vehiculo ta registra. (*) Number di auto. (*) E periodo di cuenta cu ta pagando (por ehempel: 2026).
Pidi recibo online: E contribuyentenan cu ta paga via banco por pidi e recibo online. Pa pidi e recibo online mester haci esaki via e website impuesto.aw, selecta Digitale formulieren, Kwitantie motorrijtuigbelasting y sigui e instruccionnan.
E contribuyentenan cu ta haci uzo di e servicio di pago parcial y ta haci pago via banco: por pidi e recibo online despues di completa tur e pagonan di e impuesto.
Fecha final: Corda cu dia 2 di Februari 2026 ta ultimo dia cu por paga e impuesto di e prome mita di aña 2026. Pa e vehiculonan cu ta cay den e categorianan MFA, MFV y Plachi di nomber, mester paga e impuesto di aña 2026 completo pa dia 2 di februari 2026.
Despues di 2 di februari 2026 no ta posibel mas pa paga e impuesto di e prome mita di aña 2026 den pida pida.
Debe atrasa: E contribuyentenan cu tin debe atrasa di impuesto di vehiculo di motor, no por paga e impuesto di aña 2026 tanten cu no a caba di paga e debe di añanan anterior. E contribuyentenan aki mester paga e debe den un solo biaha. Pagonan cu worde haci pa aña 2026, lo worde procesa riba e debe atrasa prome y e restante riba e impuesto di aña 2026.
Corda cu awendia no ta necesario pa warda te ora e fecha final di 2 di februari 2026 ta cerca pa cumpli cu e pago di impuesto. Manera conoci, e contribuyente lo haya un boet di 50% pa incumplimento den caso cu no haci pago of haci e pago laat. Sea ta haci pago di impuesto den un solo biaha of den varios biaha, Departamento di Impuesto ta recomenda pa cumpli na tempo y evita asina gastonan innecesario.
