Vicepresident di Parlamento, Muzaninn Wever:
ORANJESTAD (AAN): Vicepresident di Parlamento, Muzaninn Wever den un entrevista cu DIARIO a expesa su preocupacion tocante e realidad alarmante di pobresa na Aruba. Segun e Parlamentario, aunke compara cu otro islanan den Caribe, Aruba ta para miho, esaki no kiermeen cu nos ta super bon para. E Parlamentario a pone enfasis riba e importancia di e Metanan di Desaroyo Sostenibel (SDG), specificamente Meta number 1: eliminacion di pobresa den tur su forma.
E Vicepresident a remara cu na Aruba nos tin un circumstancia hopi particular pasobra nos tin un GDP per Capita cu ta hopi halto pero no necesariamente tin un igualdad di entrada y beneficionan pa henter e pueblo. Parlamentario Wever a enfatisa cu ta precisamente aki ta na unda Aruba henter mester yega enfatisando cu e rikesa di nos pais mester bin bek pa cada ciudadano.
Parlamentario Wever a remarca cu den cuadro di esaki, momento cu AVP-Futuro a drenta den gobierno, di inmediato a cuminsa traha riba esaki. Entre otro; reparatie toeslag cu pensionadonan a ricibi; studiantenan a haya asistencia pa schoolgeld; rebaho di accijns pa gasoline.
Otro proyectonan cu ya ta den plan di gobierno ta e alivio nacional pa pueblo cu ya placa pa esaki ta aloca den Presupuesto 2026. Ta trata aki di hisa reparatietoeslag atrobe aunke no na un manera global cu a wordo haci anteriormente; tambe lo bin cu huursubsidies pa esnan mas vulnerabel economicamente; lo traha riba energie toeslag hunto cu diferente otro asistencia pa pueblo.
“Mi ta kere cu nos ta trahando den mehora e posicion financiero di nos pueblo. Gobierno di Aruba ta tuma medida real pa alivia pobresa”, Parlamentario Wever a duna di conoce.
