Parlamentario y Lider di MEP a instala miembronan nobo di Parlamento Hubenil pa aña 2025-2026

Cu palabranan di felicitacion y deseonan di exito:

ORANJESTAD (AAN) Parlamento Hubenil a instala miembronan nobo, y tambe parlamentario y ministernan hubenil, pa aña 2025-2026, y ademas a instala e boluntarionan. Pa e ocasion aki, tabata un  honor pa e dama Parlamentario mr. Evelyn Wever-Croes, Lider di fraccion di MEP, tabata presente y a dedica e hobennan aki un bunita mensahe.

   “Mi ta cuminza pa felicita cada un di e hobennan cu a wordo instala, mi kier a desea boso cada un hopi, hopi exito, y tambe felicita mayornan pa sostene boso den esaki. Principalmente, mi kier a gradici cada un di e hobennan aki pa tuma e curashi, e liderazgo, anto mustra iniciativa. Y mi kier bisa bo como hoben, cu bo ta inspira otronan: adulto y hobennan. Kiermen, corda ta un role model pa nos hobennan cu ta en busca di otro role modelnan. Mi ta desea boso un Aña Parlamentario 2025-2026 sumamente fructifero”, Parlamentario mr. Evelyn Wever-Croes a subraya.