Por a mira algun hende atrobe den rij pa busca vacuna

ORANJESTAD (AAN): Awo cu a cuminsa duna vacuna na esnan di edad mas hoben, por a mira cu e reaccion a cuminza bira grandi y hopi tabata esnan mas hoben cu a bay tuma nan prome vacuna.

   Loke a hala hopi atencion ta e hecho cu na e isla ruman di St. Maarten, nan hospital cu yama St. Maarten Medical Center a bati alarma ora cu a ripara cu mayoria di e casonan grave di pashentnan cu Covid-19 hospitaliza den weekend, ta hendenan cu no a tuma ningun vacuna.  Un biaha mas St. Maarten ta bolbe haci suplica na habitantenan pa bay vacuna pasobra ta cuminza detecta un brote atrobe.

   Na Aruba pa suerte ta hopi hende a vacuna caba cu tur dos dosis, y aunke ainda no a yega na 85%, e hecho tey cu esnan cu a ricibi tur dos dosis di vacuna ta bon protehi.  Claro nan por haya e virus keto bay, pero envez di bira gravemente malo y wordo hospitaliza y kizas muri... nan lo djis haya algo estilo un verkoud leve cu den 4 dia lo pasa.

   E vacuna ta yuda cu bo no ta wordo interna den Hospital ni fayece.  E vacuna lo pone cu si bo haya e virus, ta djis un cos di 4 dia malo y cla bo ta.