Popular pelicula di Hulanda a cuminza pasa awor den Caribe

ORANJESTAD (AAN): Como 100 militar Hulandes staciona na Curacao, a ricibi un treat den fin di siman cu a pasa.  Cu nan uniform bisti, nan a haya chens di bay mira e popular pelicula ‘De Slag om de Schelde”.

   Den fin di siman e pelicula a cuminza pasa na Curacao, y entrante Diaranson 18 di Augustus e lo cuminza pasa na Aruba pa prome biaha.  Como 200 militar a wordo invita pa ta presente na e premiere na Aruba.

   Na Hulanda mes e pelicula aki ta pasando pa algun tempo caba den cinema.  Siman pasa el a sobrepasa e cantidad di 400.000 amante di cine cu a mire na Tera Frieu.

   E actornan principal a ricibi tambe e Platina Film Award.  ‘De Slag om de Schelde’ a bira tambe e mihor cine Hulandes mira e aña aki.

   “De Slag om de Schelde” a socede na fin di 1944 na Zeeland, West-Brabant y Vlaanderen.  E tabata e operacion militar di mas grandi riba tereno Hulandes.  Riba di diezmil militar alia di Belgica, Canada, Hulanda, Noruega, Polonia, y Reino Uni tabata na Walcheren cu tabata bao awa pa enfrenta e Alemannan.  E combate aki a dura como 5 siman.

   Aunke e combate aki a ricibi menos atencion cu por ehemplo e combate pa Arnhem of D-Day, toch e victoria aki di aliadonan ta wordo mira como e comienzo di e fin di Dos Guera Mundial na Hulanda.  Despues cu a recaptura e lugar aki, barconan por a bolbe drenta Schelde bek sin problema, y di e forma ey suministro di cuminda y material pa aliadonan a bira mas facil.

   E iniciativa pa e pelicula a bin di e Fondo Nacional pa Paz, Libertad y Cuido di Veteranonan (yama Vfonds), cu ta conta e storia real cu poco hende sa di dje.  Vfonds tabata kier pa den cuadro di e celebracion di 75 aña di libertad, pa pone enfasis riba e importancia di paz y libertad.

   Den e pelicula aki, diferente storia ta central, manera di un hoben Hulandes kende tabata luchando pa e Alemannan.  E rolnan principal di e pelicula tabata den man di e actornan Hulandes, Gijs Blom y Susan Radder.  Direccion tabata den man di Matthijs van Heiningen Jr.  Scenario di e pelicula tabata den man di Paula van der Oest.  E producer di e pelicula ta Levitate Film.

   “De Slag om de Schelde” ta un pelicula cu a costa 29.6 miyon Florin, y despues di e pelicula ‘Zwartboek’, e ta aworaki e pelicula di guera mas costoso traha na Hulanda.