CARACAS: Tur 43 atleta cu a representa Venezuela den e recien competencianan di Weganan Olympico Tokyo 2020, a ricibi un auto como regalo di Gobierno.
Venezolanonan a trece cas 1 medaya di oro, y 3 medaya di plata.
Mescos cu hopi gobierno rond mundo ta paga e atleta tambe un suma di placa pa cada medaya cu nan logra, Venezuela tambe ta haci esey. Otro paisnan ta stipula nan mesun premio pa atletanan cu gana un medaya.
Aunke Venezuela mes no a divulga cuanto nan a paga, un periodista a divulga cu Venezuela a duna entre US$ 50.000 y US$ 75.000 di recompensa pa cada medaya di plata cu nan atletanan a haya. Esaki toch ta un suma basta grandi.
Tin otro pais cu ta paga mas hopi. Por ehemplo, Italia ta regala e atleta cu bin cu oro e suma di 214 mil Dollar. Medaya di plata ta haya 90 mil Dollar. Medaya di brons ta haya 60.000 Dollar.
Malaysia ta duna como 237 mil Dollar pa medaya di oro, y 71.000 Dollar pa medaya di plata.
Hungria ta duna 166 mil Dollar pa medaya di oro, y 118.000 Dollar pa medaya di plata.
NBC TV siman pasa a divulga, cu atletanan Mericano ta ricibi $37.500 pa cada medaya di oro, tambe $22.500 pa cada medaya di plata, y $15.000 pa medaya di brons.
Pues e Venezolanonan parce a haya mas placa cu atletanan Mericano, plus un auto. No ta conoci ki placa e atleta Venezolano cu medaya di oro a ricibi.
Tirando bista rond mundo, por a mira cu dos atleta di Indonesia cu a logra medaya di oro den Olympiada, cada uno a ricibi un Cas nobo di Gobierno. Tambe nan a ricibi Baca como regalo, y cuminda pa bida largo.
